لوگر ولایتیده ترورچیلیک فعالیت‌لرگه قولی بارلیک‌که عیبلهنیب حبس‌گه آلینگن گودک‌لرنینگ ایتیشیچه، امنیتی کوچلر تامانیدن تیرگاوگه آلینگن‌ده چیده‌ب بولمی دیگن درجه‌ده کلتکلنگن‌لر.
سلام‌وطندار بیلن صحبت اوتکزگن مذکور گودک‌لر قوم، مذهب و تیل علاقه‌لریگه اساسن ترورچیلیک فعالیت‌لرگه عیب‌له‌نیشلرینی ایتگن‌لر. بلاغت‌گه ییتمه‌گن مذکور باله‌لر امنیتی کوچلر تامانیدن تیرگاو قیلینه‌دیگن ده یامان حالت‌ده کلتک‌له‌نیشلرینی تیل‌گه آلگن‌لر. اولرنینگ سوزلریگه قره‌گن‌ده، کوپ کلتک‌لنگن‌دن، برققه بیریلگن‌دن و بدنلری‌گه قیزدیریلگن تیمیرلر سوقلیگن‌دن سونگ مجبوریت اساسی‌ده بجرمه‌گن عیب‌لاولرنی تن آله‌دیلر.
مذکور گودک‌لر ماین اورنه‌تیش، انتحاری هجوم و ترورچیلیک فعالیت‌لرگه عیبلهنیب حبس‌گه آلینگن‌لر.
شونینگ‌دیک اوشبو گودک‌لر خانه‌دانی همده ولایت کینگشی اعضالری، پولیس‌نینگ بونده‌ی معامله‌سینی تن آلیب، بونده‌ی قیلمیش‌لر حکومت و اهالی اورته‌سی‌ده فاصله وجودگه کیلتیریش‌گه سبب بوله‌دی دیگن‌لر. اولر، عیب‌لنگن‌لرگه قرشی زوروان‌لیک‌لر دوام ایتگن حالده، ییریک اعتراض‌گه قول اوروش‌لری باره‌سیده آگاه‌لنتیرگن‌لر.
لوگر ولایت کینگشی‌نینگ اعضالریدن بیری داکتر عبدالولی وکیل، بلاغت‌گه ییتمه‌گن گودک‌لر بیلن ملی پولیس کوچلری‌نینگ بونده‌ی قوپّال معامله قیلیشی مذکور کوچلرنینگ حربی تعلیمی بولمه‌گن لیگیدن کیلیب چیقه‌دی دیگن.
بونده‌ی موردلر بارلیگینی تصدیق‌له‌گن ولایت والی‌سی‌نینگ سوزلاوچی‌سی سلیم صالح‌گه کوره، بو قبیل حادثه‌لر آلدی آلینیشی اوچون تیزلیک‌ده جدی تدبیرلر آلینه‌دی.
لوگو پولیس قوماندانی محمد داوود احمدی، سلام‌وطندار بیلن تیلفون آرقه‌لی علاقه‌ده بولیب، یوقاریده ایسله تیلگن برچه عیب‌لاولرنی رد قیلگن. اونگه کوره، واقعه‌لرگه قولی بارلیک‌که عیبلهنیب حبس‌گه آلینگن‌لر اوزلرینی آقلش اوچون بونده‌ی سوزلرنی تیل‌گه آلیش‌لری نا ممکن ایمس دیگن.
عین حالده، بیرلشگن ملت‌لر تشکیلاتی‌نینگ افغانستان‌ده‌گی نماینده‌لیگی (یونما) مملکت تورمه‌لریده زوروانلیک میزانی 14% کَمی‌گن لیگیدن خبر بیرگن ایدی.
اوشبو گزارش‌ده، تورمه‌لرده نظارت میزانی آشیریلگنی، اورگه‌تیش برنامه‌لر عمل‌گه آشیریلیشی، زوروانلیک اورنی‌گه تاکتیکی تیرگاولر قوللّنیلیشی 2013- ییل‌ده افغانستان تورمه‌لریده کلتکلش میزانی کمه‌یشی‌گه سبب بولگن دییلگن.
