مملکتده آواز بیرووچیلرنینگ رویخطگه آلیش جریانی باشلنگنیدن بیر آی اوتماقده، لیکن لوگر ولایتینینگ اوچ تومنینی اهالیسی حاضرگچه نمایندهلر کینگشی و تومنلر کینگشی سیلاولری اوچون رویخطگه آلینمهگن.
لوگر مدنی فعاللری و ولایتی کینگش اعضالریدن بیرقطارینینگ ایتیشیچه، سیلاولر ایرکین کمیسیونی، ازره، خروار و چرخ تومنلریگه رویخطگه آلیش فورم یوبارمهگن و شو یوزهدن مذکور تومنلرنینگ اهالیسی نمایندهلر کینگشی و تومنلر کینگشی سیلاولریگه اشتراک قیلیش اوچون رویخطگه آلینیشدن قالگن.
اولرگه کوره، محلی اداره سیلاولر کمیسیونی ایشلاوچیلرینینگ خوفسیزلیگینی تأمین قیلگن صورتده، سیلاو اوچون لوگر اهالیسیگه رویخطگه آلینیش زمینهسی یرهتیلهدی. اولرنینگ آگاهلنتیریشیچه، حکومت سیلاوگه اشتراک قیلیش اوچون اهالی گه زمینه یرهتمهگن صورتده، اولر ناراضیلیککه قول اورهدیلر.
لوگر ولایت کینگشی اعضاسی عبدالولی وکیل، لوگر اهالیسینینگ رویخطگه آلینمهگن ایکینچی دلیل ناتینچلیک دییدی. شونینگدیک، اوشبو ولایتده مدنی جماعهچیلیک اعضاسی لطفالله استانکزی، حکومتدن تیزلیکده مذکور ولایتده رویخطگه آلیش زمینهسی یرهتیلیشینی سورهیدی.
بیراق، اوشبو ولایت حاکمی انورخان اسحاقزینینگ ایتیشیچه، لوگرده نمایندهلر کینگشی و تومنلر کینگشی سیلاولری اوچون حاضرگچه 25 مینگدن آرتیق کیشی رویخطگه آلینگن. لوگر حاکمی، اوشبو ولایتنینگ اوزاق تومنلریده ناتینچلیک بولگنینی تصدیقلیدی، بیراق ایتیشیچه، سیلاو موادی مذکور ولایت نینگ برچه تومنلریگه یوباریلگن.
سیلاولر ایرکین کمیسیونی، جاری ییل، 28- میزان نی نمایندهلر کینگشی و تومنلری کینگشینینگ سیلاو کونی صفتیده اعلان قیلگن، بیراق سیلاولردن نظارت قیلووچی ادارهلر، کمیسیون تامانیدن اعلان قیلینگن زمانده سیلاولر یولگه قوییلیشی توغریسیده ایشانمهیدی.
