د لوګر ولایت سیمهییز چارواکي وایي، تېره شپه ناپيژانده وسلهوال د مرکز پل علم اړوند په التمور سیمه کې یوه کور ته اوښتي او د يوې کورنۍ ۴ ښځې يې وژلې دي.
د ياد ولايت د والي ویاند دیدار احمد لونګ سلام وطندار ته وویل چې د وسلهوالو په دغه برید کې یوه مور له درې لوڼو سره یو ځای وژل شوې او یوه نجلۍ او یو ځوان هلک ټپيان شوي دي.
لونګ وايي، ټپيان درملنې لپاره د کابل اېمرجنسي روغتون لېږدول شوي او زياته يې کړه چې په دې اړه يې څېړنې پيل کړې دي.
په ورته وخت کې د التمور سیمې اوسیدونکي وايي چې وسلهوالو د نورالله په نوم د یوې کورنۍ چې له هیچاه سره شخصي دښمنې نه لرله برید کړی او په ترڅ کې يې یوه مور له درې لوڼو سره یو ځای وژلې او خپله د کور څښتن نورالله له خپلې وړې خور سره ټپي شوی دی.
دوی وایي چې پېښه د امنيتي ځواکونو یوې امنيتي پوستې ته په سل مټرۍ کې شوې؛ خو د عاملانو په نیولو کې امنيتي ځواکونو بې غوري کړې ده.
د دې پېښې مسوولت تر اوسه پورې چا پر غاړه نه دی اخيستی.
