په افغانستان کې د بهرنیو ځواکونو ویاند برایان تریبوس د یوې خصوصي داخلي رسنۍ سره په مرکه کې ویلي دي، چې تر اوسه پورې له افغانستان نه د ۲۰۶ زېږدیز کال تر پایه پورې د بهرنیو ځواکونو د وتلو بهیر معلوم نه دی.
له دې مخکې د امریکا متحده ایالاتو ولسمشر بارک اوباما د تېر کال په وروستۍ میاشت کې ویلي و، چې په افغانستان کې ۹۸۰۰ امریکايي سرتېري پاتې دي او دغه شمېر پوځیان به د ۲۰۱۶ م ز کال تر پایه پورې له افغانستانه ووځي.
تریبوس زیاته کړې، چې افغانستان نه د بهرنیو ځواکونو د وتلو پر مسله به د روان کال له مني او د افغان امنیتي ځواکونو له ارزونې وروسته به پرېکړه وشي.
نوموړی وايي، چې جان کمپبل به د افغان امنیتي ځواکونو د وړتیاوو له ارزونې وروسته به په دې اړه خپل راپور سپينې ماڼۍ ته وړاندې کړي.
د امریکايي ځواکونو ویاند په افغانستان کې د طالبانو او داعش جنګیالیو حضور د اندېښنې وړ ګڼلی.
له دې وړاندې داسې راپورونه خپاره شوي وو، چې امریکا په افغانستان کې د داعش ډلې د ځپلو لپاره هډه جوړه وي.
د ملي یووالي حکومت له جوړېدو وړاندې له افغانستان نه د بهرنیو ځواکونو د بشپړو وتلو خبرې ګرمې وي، خو د نوي حکومت په رامنځته کېدو سره د کابل او واشنګټن ترمنځ د امنیتي تړون تر لاس لیک وروسته دغه خبرې له منځه لاړې.
دغه هوکړه لیک په افغانستان کې له ۲۰۱۴ کال وروسته د امریکايي ځواکونو شتون ته قانوني بڼه ورکړل شوه.
د دې تړون پر بنسټ د امریکا متحده ایالات مکلف دي، چې تر ۲۰۲۴ م ز کال پورې د افغان ملي اردو سرتېرو تمویل او روزنه وکړي.
د دغه هوکړه لیک له مخې به امریکايي ځواکونه د ۲۰۲۴ م زیږدیزکال پورې په هېواد کې د ترهګرو خلاف عملیات کوي.
د یادونې وړ ده، چې په تېرو کلونو کې د امریکا په ګډون د نړۍ ۴۹ هېوادونه په افغانستان کې حضور درلود.
