قندوز ولایتی علیآباد تومنی یشاوچیلریدن بیرقطارینینگ ایتیشیچه، اوشبو تومندهگی محلی زورهوانلر ایکینچی مرته دولتی ییرلرنی غصب ایتگنلر.
سلاموطندار بیلن صحبت اوتکزگن محل یشاوچیلرینینگ ایتیشیچه، قندوز حاکمی، چمهسی 7 آی آلدین، دولتی ییرلرگه قوریلگن اونلرچه اوینی بوزگن، بیراق محلی زورهوانلر قیتهدن اوشبو ییرلرنی غصب ایتیب بوزیلگن اویلرنی قیته قورماقدهلر.
یشاوچیلرنینگ ایتیشیچه، قوراللی کیشیلر، بو شهرچهده اوی قورهدیلر. اولر، دولت رسمیلرینی پاره خورلیککه عیبلهیدیلر.
مذکور اویلر رسمی شکلده ترقهتیلیشی باشلنمهگن بیر شهرچهگه تیگیشلی ییرلرده قوریلگن.
قندوز ملکیت و ییر بوتونلیگی ادارهسی نینگ باشلیغی محمد ابراهیم ترکمن، علیآباد تومنیگه تیگیشلی دولتی ییرلرگه محلی زورهوانلر تامانیدن اوی و جای قوریلیشیدن خبر بیرهدی. اونگه کوره، اوشبو زورهوانلر حاضرگچه بوزیلگن اویلردن کمیده 50% قیتهدن قورگنلر. جناب ترکمننینگ ایتیشیچه، اولر محلی زورهوانلرنینگ آلدینی آلهآلمهیدیلر.
قندوز والیسی اسدالله عمرخیل،غصب ایتیلگن دولتی ییرلرده قوریلگن اویلرنی بوزیش چاغیده، زورهوانلرگه قرشی توریشینی ایتگن ایدی.
جناب عمرخیل، علیآباد تومنیدهگی دولتی ییرلرگه قوریلگن اویلر بوزیلگنیدن کیین قیته قوریلگنینی رد یا-ده تصدیقلمهیدی، بیراق ایتیشیچه، شو مسئله خصوصیده، اوشبو تومننینگ حاکمی، امنیه قومندانی و باشقه اجرایی ادارهلرنینگ رسمیلری، بیفرق یاندهشگن بولسه جزالنهدیلر.
قندوز ولایتی ییر بوتونلیگی ریاستینینگ رسمیلریگه کوره، اوشبو ولایتده 8 مینگ جریبدن آرتیق دولتی ییر زورهوانلر تامانیدن غصب ایتیلگن.
