قندوز ولایتی سقوط قیلیشی ملی بیرلیک حکومتی اوچون ییریک اویَت. مملکت شمال شرقیده جایلشگن اولکن جمعیت‌گه ایگه قندوز افغانستان ملی بیرلیک حکومتی‌نینگ اجراییه رییسی بیرلشگن ملت‌لر تشکیلاتی‌نینگ عمومی ییغینی‌ده قیلگن نطق سوزی چاغیده جنگریلر تصرفیگه اوتدی. جناب؛ مذکور ییغین‌ده سوزگه چیققن زمان قندوز سقوط قیلیب جنگری طالبلر تامانیدن عامه خلق‌نینگ مال مُلکی تالان ایتیلدی.
قندوز سقوطی ملی بیرلیک حکومتی اوچون هم ییریک حربی شکست سنه‌له‌دی. اوشبو شهرده افغان امنیتی کوچلری‌نینگ کته‌قسمی ییرلشگن ایدی. پولیس حربیلری قندوز شهری و خیابانلرینی سقلشدن علاوه، ملی اردونینگ شمالده‌گی جهازلنگن ایکینچی لواسی‌نینگ ییریک بولیمی اوشبو شهرده ییرلشگن. شونینگ‌دیک ولایت خوف‌سیزلیک اداره‌سی مستحکم مخصوص گارنیزیون قطعه‌سیگه صاحب بولیب، قندوز امنیتی تامین ایتیلیشی اوچون محکم بیر مدافعه‌وی چیزیغ اوله‌راق ایجاد قیلینگن.
جاری ییل یاز موسومی‌ده مملکت‌نینگ قندوز ولایتی نیچه بار جنگریلر طرفیدن هجوم آستیگه آلینگندی، اما قندوزنینگ مدافعه‌وی خطی شکست ییمه‌گن ایدی. جمهور رییس غنی هم هر بار مصاحبه‌سی همده مدیاگه قیلگن نطق سوزیده جنگری طالب‌لرنی قندزوگه قیله‌جک یازگی هجوملرینی تیلگه آلیب، افغانستان اولکن سیناوولردن موفق چیقگن‌لیگنی اظهار ایتردی. لیکن قندوز ولایتی نهایتده میزان آیی سقوط قیلیب عصیانچی مخالف‌لر اشغالی‌گه اوتیشی ملی بیرلیک حکومتی اوچون ییریک اویَت بولدی. هنوز هم بو ولایت‌نی قنده‌ی سقوط قیلگنی اوچون انیق معلومات قول‌ده ایمس.
ساحه‌ده موجود جنرال‌لر حربی‌لرنی اداره قیلیش‌ده خطا قیلگن می، یا – ده دولت قوراللی مخالف‌لری حربی ابتکارنی اجرا ایتگن‌لیکلری سبب اولرگه مقابله قیلش نا ممکن بولگن می؟ قندوز شهریده جایلشگن امنیتی کوچلرنی انسانی همده حربی جهاز نقطه نظردن هیچ قنده‌ی کمچیلیگی بولمه‌گن.
افغانستان جمهور رییسی محمد اشرف‌غنی اوتگن هفته دوشنبه قندوز اوروشی باره‌سیده عموم خلق کونگلینی کوتاریش اوچون تلویزیونده کورینیب، لیکن قندوز استراتیژیک شهری سقوطی اوچون هیچ نرسه تیلگه آلمه‌دی. اهالی و عاموی اخبارات واسطه‌لری جمهور رییس تامانیدن ملی اردونینگ ایکینچی لوا قوماندانی، قندوز ولایت امنیه قوماندانی و بو ولایت خوف‌سیزلیک ادراه‌سی باشلیغی عدلی وقضایی اداره‌لرگه تانیشتیریلیشی‌نی کوتردیلر. شونینگ‌دیک عموم خلق جمهور رییس مملکت حربی کوچلری‌نینگ باش قوماندانی صفتیده قندوز شهری جنگریلر اشغالی‌گه اوتگنی اوچون عذر سوره‌شی نی کوتردیلر.
گویا هیچ قنده‌ی حادثه یوز بیرمه گن دیک، هیچ کیم‌نینگ ربته‌سی آلینمه دی، بیراو هم ایشدن آلینمه‌دی و هم هیج بیر عالی جناب حربی محکمه‌گه تاپشیریلمه‌دی. جمهور رییس و ینه حربی کوچلر قوماندانی قندوز شهری قیته ملی کوچلر تامانیدن آلینگن‌لیگنی تیلگه آلدی. گزارشلرده ایتیلیشیچه، افغان ملی کوچلری خلق ارا حربی‌لر همکارلیگی‌ده قندوز شهرینی قیته آلگن‌لر. قندوزنی قیته آلینیشی حتمی ایدی. لیکن بو شهرنی قیته‌دن آلینیشی قولدن بیریلگن حیات‌نی قیترمیدی. جنگری طالبلر قندوزنی تالان قیلیب، پول‌لرنی اوغیرلب، آلتین‌لرنی تاراج، دولت‌نینگ سِر حجت‌لرینی نابود قیلیب، آغیر و اینگیل قورال ییراققه صاحب چیقنلر، ایکّی کیچه و کندوز ده دولت‌گه طرفدار کیشی‌لرنی اولدیریب، حکومت اداره‌لرینی اوت‌گه یاندیریب و برچه امنیتی و جنایی محبوس‌لرنی قاچیریشگه موفق بولدی. نهایتده قندوزدیک ییریک شهر جنگریلر قولیدن ویرانه‌گه ایلتنیریلدی.
قندوز شهرینی تالان ایتیب ویرانه‌گه ایلنتیرگن مسوول کیم بولگن‌لیگی اوچون جمهور رییس، ملی مدافعه وزیری و ایچکی ایشلر وزیری جواب بیریشی کیره‌ک. شونینگ‌دیک اوشبو عالی جناب‌لر مذکور شهرده‌گی امنیتی کوچلرنینگ اصلی قرارگاهی نیمه اوچون سقوط قیلگنی باره‌سیده جواب بیریشی لازم. نیمه اوچون اوشبو حربی قرارگاه‌نینگ عسکرلری بیر تامچی قانی قالگونگه قدر اوروش قیلمی شهرنی دولت قوراللی مخالفلریگه بیریب، دولت طرفدارلری اولدیریلیشی و یوزلب خانه دانگه حرمت سیزلیک بولیش‌گه سبب بولگن‌لر. بیرینچی خط سینیشی ممکن، اما اصلی قرارگاه‌لر جمله‌دن پولیس اداره‌سی، شهری گارنیزیونی، ملی خوف‌سیزلیک باشقرمه‌سی سقوط قیلیشی ممکن ایمس. بو کیچیریلمه دیگن بیر مساله. قندوزده دولت‌نینگ طرفدارلری امنیتی کوچلر و مذکور حربی‌لرنینگ قوماندانلری امیدیده اوشبو شهرده حیات کیچیرردیلر. اهالی هیچ کیم تامانیدن حمایت ایتیلمس‌لیگینی بیلیب و طالبلر شهرگه کیریش‌نی بیلگنده ولایت‌نی ترک قیلیشلری ممکن ایدی. قندوزده ییرلشگن ملی کوچلرنینگ قوماندانی بیرینچی آدیم ده ولایت خلقی جانینی حفاظت قیلیش گه مسوولی دیر. لیکن کوزنی یومیب آچگونه شهر جنگریلر آرقه‌لی تصرف ایتیلگن. جنگری طالبلر ولایتده‌گی اصلی حربی مرکزلرنی تصرف قیلیب تالان ایتیش‌گه موفق بولگن. عصیانچی‌لر در حال ملی کوچلرنینگ ولایتده‌گی حربی جهازلرینی قول‌گه کیریتگن. اجتماعی ترماقلرده ترقه تیلگن فتو صورت‌لرگه کوره، «رنجر» تیپلی نقلیه واسطه‌لر قوراللی طالبلر قولی‌گه توشگن.
اجماعی ترماقلرده ترقه تیلگن ویدیولرنینگ معلوم قیلیشیچه، قورال‌لنگن طالبلر امنیتی کوچلرنینگ نقلیه واسطه‌لریگه منیب شهرده ایلنگن‌لر. شهر ایچکریسیده‌گی طالب‌لرگه طرفدار شخص‌لر اوز کییمی‌گه سیغمی دولت کوچلریدن قالگن موترلریانیده طالبلر بیلن ایسده‌لیک عکس آلیب، اوز ییشش اویلریده محبوس بولیب هر لحظه اولمی‌نی کوته دیگن دولت طرفدرالری سقالی‌گه کولردیلر.
مملکت قوراللی کوچلر باش قوماندانی بولیمیش جمهور رییس شمال قول اردو قوماندانینی جازلنتیریب، ملی اردو ایکینچی لوا قوماندانی، ملی خوف‌سیزلیک رییسی و بو شهر پولیس قوماندانینی حربی محکمه گه تاپشیریشب، اوزی ایسه مملکت قوراللی کوچلر باش قوماندانی صفتیده افغانستان خلقی‌دن عذر سوره‌شی مقصدگه موافق.
