قندوز ولایتی‌ده مردمی کوچلردن بیری، 5 همراه‌سینی آتیب اولدیرگن.
آتی فاش ایتیلیشی‌نی ایستمه‌گن مملکت شمال‌شرق حوزه‌سیدن بیر منبع نینگ سلام‌وطندارگه ایتیشیچه، قندوز ولایتی‌ده مردمی کوچلردن بیری، طالب‌لرنینگ همکارلیگی‌ده قومندان و 4 همراه‌سینی آتیب اولدیریب طالب‌لرگه قوشیلگن.
منبع‌گه کوره، اوشبو واقعه اوتگن کون کیچ قورون قندوز ولایتی‌نینگ خان‌آباد تومنی جنگل‌باشی منطقه‌سیده یوز بیرگن و نتیجه‌ده اویقوده یاتگن قومندان و باشقه 4 مردمی کوچ اولدیریلگن.
منبع‌نینگ کوپه‌یتیریشیچه، اوشبو مردمی کوچ‌نینگ آتی قندآغا ایکن و طالب‌لرنینگ قومندانلریدن بیری قاری هاشم‌نینگ قرینداشلریدن بولیب، انچه مدت خان‌آباد تومنی‌ده مردمی کوچلرنینگ قومندانی جبارنینگ رهبرلیگی‌ده طالب‌لرگه قرشی اوروشه‌دی ایکن.
بیراق، اوشبو خبرنی تصدیق‌لگن خان‌آباد ولسوالی حیات‌الله امیری‌نینگ ایتیشیچه، بو واقعه اوتگن کون توش چاغی اوشبو تومن‌نینگ «ملاغلام» قیشلاغیده امنیتی کوچلر بیلن طالب‌لرنینگ اوروشی‌گه یقین بیر اویده یوز بیرگن. جناب امیری، اوشبو واقعه‌نی بویروغلی بیلیب ایتیشیچه، اوشبو مردمی کوچ همراه‌لری‌نینگ حربی جهازلرینی هم آلیب کیتگن.
خان‌آباد ولسوالی گه کوره، اوشبو مردمی کوچ تخار ولایتی فرخار تومنی‌نینگ یشاوچیلریدن ایکن.
قوراللی طالب‌لر حاضرگچه بو توغریده هیچ نرسه دیمه‌گن.
خان‌آباد، قندوز ولایتی‌نینگ شرقی تومن‌لریدن بیری دیر و اوشبو ولایت امنیتی رسمی‌لری تامانیدن بیریلگن رقم‌گه کوره، شو حاضر مذکور تومن‌ده 2 مینگ‌دن آرتیق مردمی کوچ و ناقانونی قوراللی کیشی‌لر فعالیت قیله‌دیلر.
