هلمندولایتی‌نینگ محلی بلند مرتبه‌لی رسمیلری اوتگن کون (سه‌شنبه) هرات – قندهار یولی‌ده جایلشگن گرشک منطقه‌سیده اوغیرلینگن 27 کیشی‌دن 23 ته‌سی آزاد ایتیلگنی باره سی‌ده خبر بیریشگن‌لر.
گرشک تومنی‌نینگ امنیه قوماندانی محمداسماعیل اخپلواک‌نینگ سلام‌وطندارگه ایتیشیچه، مذکور یولاووچی‌لر تومن‌نینگ محلی اداره‌لری رسمیلری سعی وحرکتی نتیجه‌سیده آزاد ایتیلگن‌لر. جناب اخپلواک، آزاد ایتیلگن‌لر برچه‌سی ایراندن هیده‌ب چیقاریلگن محنتچی‌لر بولگنی بیلدیرگن.
اوتگن کون ایرتلب قوراللی طالب‌لر قندهار – هرات عمومی یولی‌ده نیچه ته 303 تیپلی موترنی توخته‌تیب 27 یولاووچی‌نی اوزلری بیلن بیرگه نا معلوم ییرگه آلیب کیتگن ایدی.
حاضر، تورت یولاووچی طالب‌لر قولی‌ده قالماقده. ایتیلیشیچه، اولرنینگ تقدیری توغریسی‌ده هیچ قنده‌ی خبر قولده ایمس. گرشک امنیه قوماندانی، تومن‌نینگ دین عالم‌لری و آقسقال‌لری اوشبو تورت کیشی هم آزاد ایتیلیشی اوچون سعی وحرکت باشله گن‌لر دیدی.
هنوزگچه 23کیشی قوییب یوباریلگن لیگی حقی‌ده قوراللی طالب تامانی بیرار نرسه دیمه‌گن.
