بوندن نیچه کون آلدین قندهار ولایتی‌نینگ شهردارلیک اداره‌سی شهرده‌گی ده‌یدی ایت‌لرنی یوق قیلیش اوچون اوچ کونلیک عمومی کمپاین اوتکزگن ایدی. اما، کورینیشیچه؛ کمپاین کوتیلگن درجه ده ایجابی نتیجه بیرمه‌گنی ایتیله‌دی.
قندهار یشاووچی‌لری‌نینگ بیر قطاری، کوچه – کویلرده‌گی ده‌یدی ایت‌لرنی ییغیش‌ده شهردارلیک اداره‌سی موفق حرکت قیلدی؛ بیراق، ایت‌لر اولیگی‌نی جمعلش‌ده یخشی عمل قیله آلمه‌گن لیگینی ایتگن‌لر. اهالی‌گه کوره، اونلب ده‌یدی ایت‌نینگ اولیگی شهر اطرافیده‌گی خیابانلرده قالگن.
بو ایت‌لرنینگ لاشه‌سیدن وجودگه کیلگن هید بوتون خلق حوصله‌سینی پیر قیلگنینی ایته‌دی قندهارلیک‌لر. اولر، شهردارلیک‌نینگ تیگیشلی اداره‌سیدن تیزلیک‌ده بو کوچیک‌لرنینگ جسدی ییغیشتیریلیب معین بیر ییرده کومیلیشی‌نی طلب قیلیشگن‌لر.
قندهار اطراف محیطنی تازه سقلش اداره‌سی‌نینگ مسووللری هم، ده‌یدی ایت‌لر جمع له‌نیشی توغریسی‌ده شهردارلیک اداره‌سی دییرلی موفق ایمس لیگینی بیلدیرگن‌لر.
اطراف محیطنی تازه سقلش اداره‌سی‌نینگ مسوولی محمدغلام روشن‌نینگ سلام‌وطندارگه ایتیشیچه، بو اداره کپماین باشلنمس‌دن آلدین ده‌یدی ایت‌لر اولدیریلگن‌دن سونگ جسدینی جمع‌لش اوچون ولایت شهردارلیک همده ساغلیق‌نی سقلش اداره‌سی ییترلی بودجه و امکانیت نظرده تویش‌لری خصوصی‌ده جریانگه قویگن لیک‌لرینی ایتگن.
جناب روشن، بو کمپاین‌ده خلق نینگ همکارلیگی‌گه البته کته احتیاج بولگن و حاضر ایسه بو قیین چیلیک اطراف محیطنی تازه سقلش اداره‌سینی آلدین‌دن کوره معما بیلن روپه ره قیلگن دیدی.
قندهار ساغلیق‌نی سقلش اداره‌سی‌نینگ مطبوعات مسوولی محمد نادر عسکر، شهر اطرافی‌ده قالگن ده‌یدی ایت‌لرنینگ جسدی شهرنی ایسلنتیریش‌دن علاوه اطراف محیطنی افلاس قیلگن لیگی باره‌سی‌ده آگاهلنتیرگن.
جناب عسکر، اهالی و شهردارلیک اداره‌سی شهرنینگ ایریم نقطه‌لریده‌گی کوچیک‌لر جسدینی ییغیش اوچون مسول‌لر دیگن.
اما، قندهار شهردارلیگی‌نینگ مطبوعات خذمتی مسوولی زمری سرگند، ده‌یدی ایت‌لرنی ییغیش کمپاینی موفقیت‌لی اوتکزیلگنلیگی‌نی تیل‌گه آلگن. اما، شهر کته لیگی ینه بعضی کوچیک‌لرنینگ جسدی شهردارلیک خادملری نظریدن چیت‌ده قالگن لیگی بو قیین چیلیک‌لرنی توغدیرگن‌لیگی‌نی تصیدق ایتگن.
شونینگ‌دیک جناب سرگند، قندهار یشاووچی‌لریدن هر بیر ییرده اولدیریلگن ایت‌لر لاش‌هسینی کورگن تقدیرده، شهردارلیک اداره‌سی تیگیشلی بولیمی بیلن علاقه ده بولیب مساله نی جریانگه قوییش‌لرنی سوره‌گن.
