قندهارده افغانستان و پاکستان چیگره کوچلری آره‌سیده یوز بیرگن آتیشمه‌لر جریانیده چمه‌سی 1000 عایله بدرغه بولگن.
قندهار ولایتی طبیعی حادثه‌لرگه قرشی کوره‌ش ریاست مسؤول‌لری اوشبو مطلب‌نی بیان قیلیب ایتیشیچه، اوشبو بدرغه عایله‌لردن کوپینچه‌سی سپین‌بولدک تومنی‌نینگ بازاری، تخته‌پل، دند، دامان تومن‌لری و قندهار شهریگه جایلشگن‌لر.
قندهار ولایتی طبیعی حادثه‌لرگه قرشی کوره‌ش ریاست باشلیغی مسعوداحمد پشتون‌نینگ سلام‌وطندارگه ایتیشیچه، بدرغه‌لردن بیر قسمی پاکستان‌نینگ چمن شهریگه کیتگن‌لر، بیراق اولردن دقیق رقم قولگه کیریتمه‌گن.
جناب پشتون‌گه کوره، اوشبو آتیشمه‌لرده پاکستان تامانیدن آتیلگن موشک‌لر نتیجه‌سیده، سپین‌بولدک یقینیده جایلشگن اویلرده 80 دن آرتیق اوی بوزیلگن و یا-ده اوتگه یانگن.
افغانستان و پاکستان چیگره کوچلری آره‌سیده‌گی آتیشمه‌لر، (15- ثور، جمعه کون) سپین‌بولدک-چمن چیگره‌سی یقینیده جایلشگن لقمان و نظر قیشلاقلریده باشلگن. قندهار امنیتی رسمی‌لری‌نینگ ایتیشیچه، بو آتیشمه‌لر پاکستان حربی‌لری نفوذ سنه‌ش بهانه بیلن افغانستان توپراغی‌گه کیریش نیتی‌ده بولیب و افغان امنیتی کوچلری‌نینگ قرشی‌لیگی‌گه روپه‌ره بولگن بیرچاغده یوز بیرگن.
بو آتیشمه‌لرده چیگره‌نینگ ایکی تامانیده‌گی امنیتی کوچلرگه هم زیان ییتکیزیلگن.
