آتی فاش ایتیلیشی نی ایستمه‌گن حکومت رسمی‌لریدن بیریسی‌نینگ سلام‌وطندارگه ایتیشیچه، دوحه‌ده افغانلر ارا سوزلشوولرده اشتراک قیله‌دیگن حکومت رسمی‌لری نینگ سفری آرتده قالگن.
منبع بو توغریده آرتیق معلومات بیرمه‌یدی، بیراق ایتیلیشیچه، جمهور رئیس نینگ اوتگن کونده‌گی صحبتی و فنی قیینچیلیک‌لرنی مذکور هیأت سفری نینگ آرتده قالیشی گه سبب بولگن.
اوتگن کون مملکت جمهور رئیسی محمداشرف غنی ارگده دوحه ییغینده طالبلر بیلن سوزله‌یدیگن 250 کیشی‌لیک هیأت بیلن اوچرشگن ایدی.
جناب غنی مذکور هیأت‌دن طالبلرنینگ افغانستان حکومتی بیلن سوزلشی اوچون قانقتیریشی و اولرنینگ افغانستان حکومتی بیلن سوزلشدن باشقه یول یوقلیگی توغریسیده توشونتیریشی نی سوره‌گن ایدی.
جمهور رئیس نینگ اوشبو ییغینده اورغولشیچه، بوندی فرصت‌لرگه تیزیم‌نینگ دوامی و حاضرگی سیاسی ساختارنی کوچلنتیریش خصوصیده مدافعه قیلیش کیره‌ک و تینچلیک خصوصیده صحبت اوتکزه‌دیگن هیأت‌دن افغانستان دولتی و یشاوچی‌لریدن مدافعه قیلیشی نی طلب قیلگن.
شو توغریده:
غنی: طالبان گروهی نینگ دولت بیلن مذاکره قیلیش‌دن باشقه یولی یوق دیر
غنی: تینچلیک سوزلشوولریده حکومت گه قرشی باسقین‌نی قبول قیلمه‌یدی
بوندن آلدین طالبلر قطر ییغینیده کیم‌سه افغانستان حکومتیدن نماینده‌لیک قیلمه‌سی توغریده صحبت بیرگن ایدی. طالبان کمیده ایکی هفته آلدین بیر خبرنامه ترقه‌تیب قطر افغانلر ارا سوزلشوولرده اشتراک قیله‌دیگن کیشی‌لر یالغیز اوز فکر و توشونچه‌لرینی بیان قیله‌دی دیگن ایدی.
بوگون پنج‌شنبه افغانستان حکومتی نینگ هیأتی قطر افغانلر ارا سوزلشوولرگه اشتراک ایتیش اوچون دوحه تامان سفر قیلیش‌لریگه قرار قیلینگن ایدی.
قطر افغانلر ارا ییغینی کیله‌جک هفته شنبه و یکشبنه کون‌لرده افغانستان حکومت نماینده‌لری، سیاستچیلر و طالبلر آره‌سیده قطرنینگ دوحه شهریده یولگه قوییلیشی ممکن.
