افغانستان ملی کنگره حزبی، اسلامی حزب رهبری گلبدین حکمتیارنینگ تینچلیک لایحه‌سیگه قوشیلگنی‌دن مقصد، قدرت و امتیاز آلیش دیب و افغانستانده قتیق اوروش باشله‌نیشی توغریسیده آگاه‌لنتیردی.
دوشنبه کون خبری بیر ییغینده نطق سوزله‌گن مملکت ملی کنگره حزبی باشلیغی عبداللطیف پدرام، حکمتیارنینگ تینچلیک‌که قوشیلگنی‌گه اشاره قیلیب و اونینگ بو ایشی‌نی تینچلیک اوچون ایمس، بلکیم قدرت‌گه ییتیشیش دیگن.
جناب پدرام، اسلامی حزب رهبری کابل‌گه قیتگنینی امریکالیک‌لرنی ینگی پروژه‌سی دیب و افغانستانده ینگی بیر اوروش باشله‌نیشی‌نی بیلدیرگن.
ملی کنگره حزبی‌نینگ رهبری‌گه کوره، حکمتیار امریکانینگ تیک اوچرلر و مینگ‌لرچه ناقانونی قوراللی کیشی‌لرنینگ سایه‌سیده کابل کیلگن و امنیتی اداره‌لرده عضویت آلیش اوچون تکلیف ایتیلگن 3500 کیشی‌لیک رویخط امتیاز آلیش‌نی کورسته‌دی.
ملی کنگره حزبی‌نینگ باشلیغی، اوتمیش‌ده‌گی اوروش جنایت‌لری اونوتیلیشی خصوصیده، اسلامی حزب رهبری و باشقه بیرقطار جهادی‌لرنینگ قراریگه قرشی اوروش‌گه قربان بولگن‌لرنینگ عایله اعضالری و انسان حق و حقوقلری ایرکین اداره‌لریدن دعوا ریجه‌سی آچیب و اوروش جنایتچی‌لرینی محکمه‌گه تارتیش‌لرینی سوره‌گن.
بیراق، اسلامی حزب سوزلاوچیسی نادر افغان، حکمتیارنینگ قدرت طلب‌لیگی توغریسیده، جناب پدرام‌نینگ ادعالرینی رد قیلیب و امنیتی کوچلر تشکیلاتی‌ده اسلامی حزب اعضالریدن 3500 کیشی جایلشتیریلیشی‌دن مقصد، مملکت‌گه خذمت قیلیش و ایلگریدن مذکور حزب بیلن افغانستان دولتی‌نینگ آره‌سیده قول قوییلگن تینچلیک کیلیشووی اساسیده دییدی.
عین حالده، دموکراسی ایشلری بوییچه ییتکچی‌لر تشکیلاتی، اسلامی حزب تینچلیک لایحه‌سیگه قوشیلگنینی خوش قرشی‌لب و اونی مملکت منفعتی‌گه دیگن.
مذکور تشکیلات مسؤول‌لری، اسلامی حزب تامانیدن اساسی قانون و سیلاو کبی دموکراسی ارزشلری قبول ایتیلگنینی تقدیرلب و اوشبو حزب‌نینگ مسؤول‌لریدن سونگی ییغین‌لرینی مدنی شکلده قورال‌سیز یولگه قوییش‌لرینی سوره‌گن.
شونده‌ی بیرحالده، نیچه کون آلدین، انسان حقلرینی تیکشیرووچی اداره تامانیدن ترقه‌تیلگن گزارش‌ده، گلبدین حکمتیارنینگ قیتگنی اوروش گروهی رهبرلری قنده‌ی بیر شکلده قدرت قولگه کیریتیش توغریسیده، قورقینچ‌نی ایسلش دیگن.
افغانستان بوییچه انسان حقلرینی تیکشیرووچی اداره‌نینگ ییریک تدقیقاتچیسی پاتریشیا گاسمن، سونگی گزارشی‌ده جناب حکمتیار کابل‌گه کیلیب خلق حضوریده بیانات بیرگنینی بحث‌گه آلگن.
اوشبو گزارش‌ده ایتیلیشیچه، حکمتیارنینگ کاروانی قدرت قولگه کیریتیش اوچون اوروش جنایتی‌گه عیب‌لنیب و یمان کوز بیلن قره‌لیب تبعید ایتیلگن جنایتچی صفتیده ایمس، بلکیم قورال و نارنجک بیلن جهازلنگن کیشی‌لردن توله بولگن «اس‌یووی» موترلری‌نینگ سایه‌سیده بیر «قهرمان» دیک کابل کیلگن.
گلبدین حکمتیار، کابل‌ده قدرت قولگه کیریتیش اوچون 40 ییل قورال کوتردی و اوتگن 15 ییل‌ده، طالب‌لرنینگ تیزیمی سقوط قیلگنی‌دن کیین، تشقی کوچلرنی چیقاریش و اوز ایسته‌گی بیلن اسلامی حکومت ایجاد ایتیش اوچون کوره‌شدی. او، نتیجه‌ده برچه ایستک‌لریدن وازکیچیب و افغانستان تینچلیک لایحه‌سیگه قوشیلدی.
حکمتیار، 20 ییل‌دن سونگ، 14- ثور، آغیر و یینگیل قورال‌لر بیلن جهازلنگن اونلرچه قوراللی کیشی‌نینگ همراه‌لیگی‌ده کابل‌گه کیردی.
