قاچقینلر و باشپناه ایزلاوچیلر وزیرلیگی، معلومت و مدنیت و ایچکی ایشلر وزیرلیگی و مخابراتی خذمتلرنی تنظیم قیلیش (اترا) ادارهسی یاردمی بیلن ناقانونی مهاجرلیگیکه توسیق بولیش کمپاینینی یولگه قویگن.
بوگون "پنجشنبه" قاچقینلر و باشپناه ایزلاوچیلر وزیرلیگی نینگ کابلده اوتکزگن ییغینده ایتیشیچه، اوروش، ناتینچلیک، کمبغللیک و ناقانونی مهاجرلیک نینگ خطرلری خصوصیده معلومات بیریلمهگنی ناقانونی مهاجرلیک کوپهیشیگه سبب بولگن.
قاچقینلر وزیرلیگی مسووللری نینگ ایتیشیچه، حاضرده 6 میلیوندن آرتیق افغانستانلیک، چیتایللیک مملکتلرده قاچقین صفتیده حیات کیچیرهدی.
قاچقینلر و باشپناه ایزلاوچیلر وزیرلیگی اورین باسری داکتر عالمه نینگ ایتیشیچه، کمبغللیک و مهاجرلیک خطرلری خصوصیده معلومات بیریلمهگنی سبب، ناقانونی مهاجرلیکلر کوپهیگن.
خانم عالمه نینگ کوپهیتیریشیچه، بیرلشگن ملتلر تشکیلاتی نینگ آمارلریگه کوره، ناقانونی مهاجرلیککه قربان بولگنلردن 70% عیاللر و قیزلر دیر.
اترا ادارهسی نینگ میدیالر بولیمی باشلیغی سید شینواری نینگ ایتیشیچه، اوشبو اداره مذکور کمپاینده مملکت یشاوچیلرینی مملکتده قالیشلری اوچون تشویق قیلهدی. اونینگ ایتیشیچه، اترا ادارهسی فعال بولگن شمارهلرگه قیسقه کتبی پیام یوباریش بیلن یشاوچیلرنی ناقانونی مهاجرلیک خطرلری خصوصیده آگاهلنتیرهدی.
ایچکی ایشلر وزیرلیگی نینگ عمومی استراتیژی بولیمی باشلیغی بسمالله تابان نینگ ایتیشیچه، ایچکی ایشلر وزیرلیگی انسان قاچاقیگه قرشی کورهشیشگه تعهدلی دیر.
جناب تابان نینگ ایتیشیچه، سونگی بیر ییل جریانیده انسان قاچاقچیلریدن 14 تهسی قولگه آلینگن و دوسیهلری عدلی و قضایی نهادلرگه تاپشیریلگن.
