دشت‌قلعه تومنیده یوز بیرگن اوروش نتیجه‌سیده آواره بولگن‌لردن تورت عایله‌سی، تخار مرکزی تالقان شهری‌نینگ بیر چیکه‌سیده خیمه قورگن‌لر. اوشبو عایله‌لر قارلی قیش و ساووق کیچه‌لرنی خیمه‌ده اوتکزیب کیلماقده‌لر.
اولرنینگ ایتیشیچه، یمان وضعیت‌ده حیات کیچیره‌دیلر و حکومت اولرنینگ وضعیتی‌گه دقت قیلمه‌یدی.
اوشبو آواره‌لردن بیری قاری نعیم‌نینگ ایتیشیچه، هوا ساووق‌لیگی و امکانیت یوق‌لیگی باعث، باله‌لری جدی تهدید بیلن روپه‌ره بولگن.
اولر دشت‌قلعه تومنی‌نی النگ منطقه‌سی‌نینگ یشاوچیلری دیر. اولرنینگ ایتیشیچه، قیشلاق‌لری طالبلر نظارتی‌گه دیر و حکومت‌دن همکارلیک قیلیش‌نی سوره‌یدیلر.
عین حالده، تخار ولایتی کینگش اعضاسی محمداعظم افضلی‌نینگ ایتیشیچه، اوروش‌لردن آواره بولگنلر تالقان شهری‌نینگ تورلی منطقه‌لریده کرایی اوی‌لر و خیمه‌لرگه حیات کیچیره‌دیلر و اولرنینگ جدی یاردم‌‌گه نیازلری بار.
شونینگ‌دیک تخار حاکمی سوزلاوچیسی جواد هجری‌نینگ ایتیشیچه، آواره‌لرنینگ وضعیتی حکومت تامانیدن تیکشیریلگن و همکارلیک‌لر توزیع ایتیلماقده.
هجری‌گه کوره، اوتگن بیر هفته جریانیده اوروش‌لردن آواره بولگن 470 عایله‌گه 5.2 میلیون افغانی ارزش‌لی آذقه-اوقات و نقده پول توزیع ایتیلگن.
تخار ولایتی بوییچه طبیعی واقعه‌لرگه قرشی کوره‌ش اداره مسووللری‌نینگ ایتیشیچه، اوشبو عایله‌لرگه همکارلیک ایتیلگن، بیراق اولر منطقه‌لریگه باریش‌نی ایستمه‌یدیلر.
آواره‌لردن کوپ قطار قندوز ولایتی‌نینگ دشت‌ارچی تومنی و تخار ولایتی‌نینگ خواجه‌غار، دشت‌قلعه، بنگی و بهارک تومن‌لریدن اوشبو ولایت مرکزی‌گه جای‌لشگنلر.
