د افغانستان او پاکستان له پاره د امريکا ځانګړی استازی ډانيل فيلډمن وايي، چې د متحده ایالاتو مرستې به د ملي وحدت حکومت د مشرانو د يووالي پورې مشروطې وي.
نوموړي د افغانستان اجرايوي مشر ډاکټر عبدالله عبدالله سره د ليدنې پر مهال زياته کړه، چې امريکا به د ملي وحدت حکومت سره خپلو اوږدمهالو مرستو ته دوام ورکوي.
همدارنګه د افغانستان اجرايوي ریاست هم په دې اړه خبرپاڼه استولې.
په خبرپاڼه کې راغلي، چې د افغانستان او پاکستان له پاره د امريکا ځانګړی استازی او ډاکټر عبدالله عبدالله د هېواد، سیمې، افغانستان او امریکا ترمنځ په اړیکو خبرې وکړې.
خبرپاڼه کاږي، د افغانستان او پاکستان له پاره د امریکا ځانګړي استازي ډانیل فیلډمن وویل، چې سپينه ماڼۍ د ولسمشر اشرف غني او اجرایوي رییس ډاکټر عبدالله عبدالله په مشرۍ د ملي یووالي له حکومت نه خپل اوږدمهاله ملاتړ ته ژمنه ده.
دغه استازي زياته کړې، د سولې لپاره ښه فرصت برابر شوی دی او په کار ده، چې له دې فرصت نه ګټه واخیستل شي.
عبدالله له افغانستان سره د امریکا له اوږدمهالو مرستو مننه وکړه او ویې ویل، چې د نوي حکومت په رامنځته کېدو سره د پخوا په پرتله دواړو هېوادونو ترمنځ اړیکې ښې او غښتلي شوې دي.
فيلډمن زیاته کړه په کار ده، چې د افغانستان د کورنیو مسایلو په اړه افغان حکومت دواړه مشران په ګډه پرېکړې وکړي او کورني مسایل باید په کورنۍ کچه حل شي.
یاده دې وي، چې د دواړو ګاونډيو هېوادونو له پاره د امريکا ځانګړی استازی په يوه کاري سفر کابل ته راغلی؛ د راپورونو پر بنسټ له دې وړاندې يې د ولسمشر اشرف غني سره هم ليدلي دي او په پام کې ده، چې له کابل څخه وروسته پاکستان او بیا هند ته سفر وکړي.
