اوتمیش نیچه کون مابینیده ایران رسانهلریدن مولانا جلالالدین محمد بلخی نینگ مثنوی معنوی کتابی ایران و تورکیه مملکتلری بیرگهلیک مدنی میراثی دیب ترقهتیلگنلیگی، مملکت مدنی، یازووچی و شاعرلرینی قرشیلیکلری بیلن روپهره بولیب و بولردن کوپیسی اوزفسبوکلریده افغانستان دولتیدن ایران و تورکیه دولتلری نینگ بو حرکتیگه توسیق چیقیشینی سورهگنلر.
بلخ بیلیم یورتی اوقیتوچیسی و شاعر، صادق عصیان نینگ ایتیشیچه، مولانانینگ توغیلگن ییری بلخ بولگن و افغانستان دولتی مولانانینگ مثنوی معنوی کتابی یونسکو و بیرلشگن ملتلر تشکیلاتیده ثبت قیلینیشی اوچون ایلغار حرکت قیلیشی لازم.
جناب عصیان دولتنی مملکت مدنیتیگه توجه سیزلیککه عیبلیدی و دولت بوباره ده کوتاهلیک قیلگن صورتده مملکت مدنیتچیلری حمایتینی قولدن بیرهدی دیب آگاهلنتیرهدی.
او، دولت و مدنی نهادلردن بوباره ده توجه قیلیشلرینی سورهیدی و افغانستان دولتی یونسکو عضوی بولگن مملکتلر بیلن تماس آلیب موضوعنی اولر و بیرلشگن ملتلر تشکیلاتی بیلن اورته گه قوییشی لازم دیب بیلهدی.
عین حالده، اجراییه ریاستینینگ مدنی مصلحتچیسی سیدحسین فاضل سانچارکینینگ سلاموطندارگه ایتیشیچه، افغانستان دولتی، ایران و ترکیه دولتلرینینگ بو ایشی خصوصیده، یونسکو مدنی تشکیلاتینینگ خبردار قیلگن و بو تشکیلات افغانستان دولتینینگ فکرینی اورگنمسدن هیچ بیر ایش قیلمهیدی.
اجراییه ریاستی مدنی مصلحتچیسینینگ کوپهیتیریشیچه، مولانانینگ مثنوی معنوی اثری بوتون دنیا مملکتلرینینگ مدنی سرمایهسی دیب تانیلگن و هیچ بیر دولت بو کته اثرنی اوز آتیگه رویخطگه آله آلمهیدی.
عین حالده، قطار یازووچیلر و مدنیلرنینگ ایتیشیچه، ایران دولتی بوندن آلدین هم، کوپلب شاعرلرنی اوز مملکتینینگ آتیگه رویخطگه آلگن و بو ایش ایران دولتینینگ بیرینچی و سونگی ایشی بولمهگن.
