جمهورلیک ریاستینینگ فرهنگی بولیم مصلحتچیسی، فرهنگی‌لرگه همکارلیک قیلیش اوچون آیی‌ده 8 مینگ آمریکا دالرینی جمهورلیک ریاستی دفتریدن قولگه کیریته‌دی.
شو موضوع توغریسیده سلام‌وطندارنینگ قولی‌گه توشگن مکتوب گه کوره، اوشبو پول کم‌بغل فرهنگی‌لرگه همکارلیک قیلیش، فرهنگی مرکزلرنینگ جهازلرینی تیارلش، آیی‌ده بیر کتاب چاپ ایتیلیشی، مرکز و ولایت‌لرده علمی و فرهنگی سمینارلر یولگه قوییلیشی توغریسیده صرفله‌نیشی ایتیلگن.
اوشبو مکتوب جمهورلیک ریاستینینگ فرهنگی مصحلتچیسی اسدالله غضنفر تامانیدن، 1394-11-27 تاریخی ده جمهورلیک ریاستینینگ اداری ایشلر اداره‌سیگه یوباریلگن و جمهور رئیس ایسه، 1394-12-2 تاریخی ده مذکور تکلیفی مکتوب نی امضاء قیلیب و بو پول 91- کد دن بیریلیشی توغریسیده بویروغ بیرگن.
سلام‌وطندارنینگ اختیاریگه توشگن تکلیفی مکتوب گه کوره، صرفلنگن پول بونده‌ی بیان قیلینگن:
- کم‌بغل فرهنگی‌لرگه همکارلیک قیلیش و فرهنگی مرکزلرگه جهاز تیارلش اوچون آیی‌ده 5 مینگ دالر.
- آیی‌ده 1 جلد کتاب چاپ ایتیلیشی اوچون 1 مینگ دالر.
- مرکز و ولایت‌لرده علمی و فرهنگی سمینارلر یولگه قوییلیشی اوچون آیی‌ده 1 مینگ دالر.
- فرهنگی‌لر بیلن علاقه قوریش و اولرنی کوتیب آلیش اوچون 5 یوز دالر.
بیراق، مملکت فرهنگی‌لری، یازووچی‌لری و شاعرلریدن بیرقطاری، بونده‌ی لایحه و خرجت‌دن خبرسیزلیک بیلدیرگن‌لر.
بیلیم یورت اوقیتووچیسی و مملکت شاعرلریدن بیری کاوه جبران‌نینگ ایتیشیچه، جمهورلیک ریاستینینگ فرهنگی مصحلتچیسی فرهنگی‌لر نامی‌ده دولت خزانه‌سیدن چیقاره‌دیگن پول‌نی جمهور رئیس‌گه تیگیشلی بولگن فرهنگی‌لرگه بیره‌دی.
شاعر و فرهنگی فعال‌لردن باشقه بیری محمود جعفری‌نینگ ایتیشیچه، حاضرگه‌قدر چاپ ایتیش و فرهنگی ییغین‌لرگه صرفله‌نیش اوچون هیچ قنده‌ی پول دولت آدرسیدن قولگه کیریتمه‌گن. جناب جعفری گه کوره، حکومت بو توغریده قانیقرلی جواب بیریشی کیره‌ک.
جمهورلیک ریاستینینگ فرهنگی بولیم مصحلتچیسی اسدالله غضنفر، ایسلنگن مکتوب صادر ایتیلگنینی تصدیق‌لب ایتیشیچه، اوشبو پول‌نی نیچه مرته فرهنگی بولیم مصلحتچی‌لیک دفتریدن قولگه کیریتگن؛ بیراق انچه مدت‌دن بویان بو همکارلیک کیسیلگن.
جمهورلیک ریاستینینگ فرهنگی بولیم مصحلتچیسی، بیر مکانیسم بارلیگی‌نی ایته‌دی؛ لیکن مکانیسم توغریسیده معلومات بیرمه‌یدی.
مملکت‌ده فرهنگی‌لردن کوپینچه‌سی اقتصادی قیین‌چیلیک‌که روپه‌ره بولیب تورگن بیرچاغده، بو مکتوب میدانگه چیققن.
