په فراه ولایت کې د شنو خونو محصولاتو بیې په بېمخینې توګه کمې شوي چې کروندګر یې خواشیني کړي دي.
د فراه یوشمېر کروندګر وايي، اوس د یو کیلو هندواڼې بیه یوه افغانۍ، د یو کیلو بادرنګو یوه نیمه افغانۍ او د یو کیلو روميبانجانو او توربانجانو بیه دوه افغانۍ ده.
دغه کروندګر وايي، د شنو خونو محصولاتو بیه دومره کمه شوې چې د سبزیجاتو پر کښت لګول شوې پیسې هم نه جوړوي.
د دوی په وینا، د شنو خونو محصولاتو ساتلو لپاره د سړو خونو نشتوالی، له هېواده بهر د سبزیجاتو نه صادرول او په دغه ولایت کې ناامنۍ لامل شوي چې د مېوو او سبزیجاتو بیه کمه شي.
نظرمحمد چې په فراه کې شنه خونه لري، سلاموطندار ته وویل چې د دوی له لوري د کرل شویو سبزيجاتو بیې په په بېسارې توګه ټیټې شوي چې په وینا یې، یوه کیلو هنډوانه په یوه افغانۍ شوې ده.
د فراه یو بل اوسېدونکی امیر محمد هم ولایتونو یا له هېواده بهر د شنو خونو د محصولاتو صادرولو ته د حکومت، په ځانګړې توګه د کرنې وزارت په نه پام نیوکه کوي او وايي، اوس په نورو ولایتونو کې د یو کیلو رومي بانجانو بیه ۴۰ افغانۍ ده، خو په دغه ولایت کې په دوه افغانۍ پلورل کېږي.
د فراه د ولایتي شورا مرستیال شاهمحمود نعیمي هم پر حکومت نیوکه کوي او وايي، په دغه ولایت کې د شنو خونو د محصولاتو بیه دومره ټيټه شوې چې ان کرونګر ښار ته د خپلو محصولاتو د لېږدولو لګښت هم نهشي پوره کولای. د نوموړي په وینا، حکومت، په ځانګړې توګه د کرنې وزارت باید د یادو مېوو او سبزیجاتو لپاره بازار پیدا کړي.
خو د فراه د کرنې رییس منان متین وايي، په دغه ولایت کې د شنو خونو محصولاتو بیه د سبزیجاتو او مېوو د حاصلاتو زیاتېدو او د تېرو څو ورځو رخصتیو او ناامنیو له کبله ټيټه شوې ده.
د نوموړي په وینا، سږ کال یوازې د هندواڼې حاصلات له ۶۷۰ زره ټنه ۷۹۰ زره ټنه ته زیات شوي چې ۱۷ سلنه زیاتوالی ښيي.
د فراه د کرنې رییس همدارنګه وايي، اوس په دغه ولایت کې د ۵۰۰ ټنه مېوو ساتلو په ظرفیت د یوې سړې خونې جوړولو طرحه په ملي تدارکاتو کې د ارزونې په پړاو کې ده او تمه لري چې په روان کال کې به یې چارې پیل شي.
