فاریاب ولایتی‌نینگ اندخوی تومنی اطرافیده بولگن تورت تومنده امنیتی کوچلر و طالب‌لرنی آره‌سیده بیر هفته‌دن بویان آتیشمه دوام ایتماقده و شونچه مدتده 4000 دن آرتیق عایله بدرغه بولیب جوزجان، بلخ ولایت‌لری و اندخوی تومنی‌نینگ مرکزیده جایلشگنلر.
نماینده‌لر کینگشی اعضاسی بشیراحمد ته‌ینچ نینگ ایتیشیچه، امنیتی وضعیت یمانلیگی باعث، اندخوی اطرافیده بولگن تومن‌لرنی یشاوچیلریدن کوپینچه‌سی بدرغه بولگنلر و اولرنینگ وضعیتی خواطرلی دیر.
فاریاب ولایتی کینگش اعضاسی آق‌محمد نوری‌نینگ سلاموطندارگه ایتیشیچه، اوچ تومن‌دن یشاوچی‌لری اندخوی شهریده بدرغه بولگنلر و جای‌لشیش اوچون اولرگه مناسب جای یوق. اونینگ ایتیشیچه، بدرغه بولگنلر جاده‌لر و هوتل‌لرگه جایلشگنلر.
بدرغه بولگن‌لردن بیری رحیمه‌نینگ ایتیشیچه، قیشلاق‌لری طالب‌لر نظارتی‌گه اوتگن و اولر جای‌لرینی ترک قیلیش‌گه مجبور بولگنلر.
فاریاب ولایتیده جای‌سیز بولگنلر و قاچقین‌لر اداره‌سی باشلیغی آقامحمد رحیمی‌نینگ ایتیشیچه، بدرغه بولگن‌لرگه یاردم بیریش اوچون بیر کمیته قوریلگن.
ایتیش کیره‌ک‌که اوتگن کونی فاریاب حاکمی نقیب‌الله فایق طالبلرگه قرشی بولگن حربی عملیات‌نینگ دوام تاپیشی‌دن خبر بیریب و آقینه بندری‌نینگ طالب‌لر تهدیدی آستیگه قرار تاپیش اوچون اجازه بیرمسلیگی‌نی بیلدیرگن ایدی.
