بېځایه شوې بي بي معرفت وایي، د سړې هوا، لوږې او حکومت بېپروایي له امله یې نوی زېږېدلی ماشوم د تورو خاورو بندي شو.
د اغلې معرفت په وینا، له دوو میاشتو د حکومت او مرستندویو بنسټونو مرستو ته په تمه یې خپل اولادونه له لاسه ورکړل.
دا خبرداری ورکوي، اوس یو شمېر نور ماشومان هم ـ چې تر خېمو لاندې ژوند کوي ـ د لوږې او سړې هوا له جدي ګواښ سره مخ دي.
د جګړو له امله د فاریاب یو شمېر بېځایه شوي ـ چې د جوزجان ـ فاریاب لار یې تړلې ـ وایي له ۴۱ ورځو راهیسې بېځایه شوي؛ خو تراوسه د دولت په ګډون هېڅ بنسټ د مرستې لاس نهدی وراوږد کړی.
د دوی په وینا، د وروستیو ورځو سړې هوا او لوږې د ۱۳ ماشومانو ژوند اخېستی او ۴۰ نور سخت ناروغ شوي چې وضعیت یې د اندېښنې وړ دی.
دوی وايي چې په سړې هوا کې تر پلاستیکي خېمو لاندې ژوند کول حتمي مرګ ته هرکلی ویل دي.
د جوزجان د کډوالو او بېرته راستنېدونکیو چارو رییس عبدالمالک رستمي سلام وطندار ته وویل، بېځایه شوې کورنۍ به سبا ښوونځیو او نورو مناسبو ځایونو ته ولېږدوي چې له دې وضعیته وژغورل شي.
د ښاغلي رستمي په وینا، دې کورنیو ته د مرستو رسول د ځايي ادارې له توانه بهر دي او اړینه ده چې حکومت پهدې برخه کې مرسته وکړي.
ښاغلی رستمي زیاتوي، په ۲۰۱۸ کال کې د کډوالۍ او بېځایه شویو کورنیو اړوند نږدې ۱۱ زره ۳۷۴عریضې دې ادارې ته رسېدلي چې ۴۴۴۰ عریضو ته ځواب ویل شویدی.
