غور ولایتی‌نینگ محلی رسمی‌لری و غربی تومن‌لری یشاوچیلری‌نینگ ایتیشیچه، قوراللی طالب‌لر اولردن «باج» ایسته‌یدی.
غور ولایت کینگشی اعضاسی عبدالبصیر قادری‌نینگ سلام‌وطندارگه ایتیشیچه، قوراللی طالب‌لر غور-هرات قتناو یولی‌نی نظارت‌گه آلگنی‌گه قوشیمچه، غورنینگ آلتی غربی تومنیده فعالیت قیله‌دی. جناب قادری گه کوره، نیچه آیدن بویان قوراللی طالب‌لر دولت ایشلاوچیلری، محل یشاوچیلری و نیچه تومن‌نینگ دوکاندارلریگه نامه‌لر یوباریب و اولردن پول توپلش‌لرینی سوره‌گن.
غور ولایت کینگشی اوشبو اعضاسی‌نینگ ایتیشیچه، طالب‌لر تامانیدن یوباریلگن نامه‌لرده کیلیشیچه، هر بیر محل یشاوچیسی‌دن 100 افغانی، هر بیر موتر، موترسایکل و اون ماشینی 2 مینگ‌دن باشلب 5 مینگ افغانی‌گچه و شونینگ‌دیک، اِینَک و قویدن 500 افغانی اولرگه توللشی کیره‌ک. قادری‌نینگ آگاه‌لنتیریشیچه، قوراللی طالب‌لرنینگ فعالیتی و «باج» آلیش‌لرینی آلدی حکومت تامانیدن آلینمه‌گن صورتده، کیله‌سی کوکلم موسومی‌ده امنیتی وضعیت حاضردن کوره یمان بولیشی ممکن.
شونینگ‌دیک، غور مدنی فعاللریدن بیرقطاری، اوشبو ولایت‌نینگ کوپینچه منطقه‌لریده طالب‌لرنینگ کینگ فعالیتی و «باج» آلیش‌لرینی خواطرلی بیلیب ایتیشیچه، اولر نیچه مرته مذکور ولایت‌نینگ محلی مسؤوللری و مرکز رسمی‌لریدن عصیانچی‌لرنینگ مهم جایلرینی نشانگه آلیش‌لرینی سوره‌گن، بیراق حاضرگچه اولرنینگ ایستک‌لریگه هیچ قنده‌ی دقت قیلینمه‌گن.
بیراق، غور ولایتی‌نینگ پولیس قومندانی غلام مصطفی محسنی، مذکور ولایت‌نینگ مدنی فعاللری و ولایت کینگشی اعضالری‌نینگ ادعالرینی رد قیلیب ایتیشیچه، طالب‌لر یالغیز نظارتلریده بولگن منطقه‌لردن «باج» آله‌دی. غور پولیس قومندانی گه کوره، اولر حاضرگچه دولت ایشلاوچیلری و تینچ اهالی‌دن قوراللی طالب‌لر «باج» آلیشی توغریسیده گزارش قولگه کیریتمه‌گن.
عین حالده، غور ولایت کینگشی اعضالری و مدنی فعاللری‌نینگ ایتیشیچه، قوراللی طالب‌لر اهالی‌دن توپله‌گن پوللرگه قورال و حربی جهاز ساتیب آلیب و امنیتی کوچلرگه قرشی اوروشه‌دیلر.
