طالبان گروهی اوتگن هفته غور ولایتی بوییچه انسان حقلری کمیسیونی نینگ ولایتی دفتر سرپرستی عبدالصمد امیری نینگ غور-کابل قتناو یولیدن اوغیرلب و اوتگن هفته پنجشنبه کون اونینگ جانسیز جسدینی مذکور یولده تشلهگن.
امیری نینگ عایلهسی گه کوره، او هیچ بیر گروه و سمت بیلن علاقهده بولمهگن و یالغیز مقصدی اهالی گه خذمت قیلیش و اولرنینگ حق و حقوقلرینی تأمینلش ایکن.
امیری نینگ ابهسی احمدحسین دانشیار، جیینی نینگ اولیمیدن قتیق تأثیرلنیب ایتیشیچه، امیری عایلهسی نینگ یالغیز فرزندی ایکن و تورموش قورگنیدن بیر ییل دن کوپراق اوتیب و نتیجهسی 7 آیلیک بیر باله بولگن.
شونینگدیک، عبدالصمد امیری نینگ همکسبی فریده ناصری نینگ ایتیشیچه، امیری اوزی و مملکتی اوچون بولگن کوپلب آرزو و آرمانی بیلن کیتگن. خانم ناصری نینگ کوپهیتیریشیچه، امیری هیچ بیر گروه گه باغلیق بولمهی و یالغیز ایستهگی جماعه نینگ نیازمند کیشیلری گه دادخواهلیک قیلیش ایدی.
عین دمده، غور ولایتی بوییچه انسان حقلری کمیسیونی نینگ ولایتی دفتر مسؤوللری، ولایت کینگشی اعضالری و مدنی فعاللری، خبری بیر ییغین اوتکزیب، رحمتلی امیری طالبان تامانیدن اولدیریلگنینی قتیق قارهلشگن.
غور مدنی ادارهلرینی اویغونلشتیرووچی محمدحسن حکیمی نینگ ایتیشیچه، طالبان هیچ بیر زمان بیرگن سوزی گه عمل قیلمهگن و اسلام و انسانیت ارزشلریگه قرشی گناهسیزلرنی اولدیرهدی. جناب حکیمی، رحمتلی امیری نینگ قتل قضیهسی حکومت تامانیدن جدی شکلده تیکشیریلیشینی سورهگن.
شونینگدیک، غور ولایت کینگشی اعضاسی عبدالحمید ناطقی، امیری نینگ قتلی نی قارهلب و حکومت دن اهالی اینیقسه مدنی فعاللرنینگ خوفسیزلیگی تأمینلنیشی نی طلب قیلگن.
طالبان جنگریلری اوتگن هفته پنجشنبه کونی غور ولایتی بوییچه انسان حقلری کمیسیونی نینگ ولایتی دفتر سرپرستی عبدالصمد امیری نینگ باشینی کیسگن.
شو توغریده…
طالبان گروهی غور ولایتیده انسان حقلری کمیسیونی سرپرستی نینگ باشینی کیسگن
