«هر هفته کوچه اهالیسینینگ دروازهلرینی اونگیدن اخلتلرنی ییغیب و موترسایکل بیلن شهردارلیک تامانیدن قوییلگن اخلت تشلاوچی قوطیلرگه انتقال بیرهمن. بو ایش وضعیتیم یخشی بولیشیگه سبب بولگن. دستلب بیر کراچیم بار ایدی و اوندن سونگ، اوچ تایرلی موتر سایکل ساتیب آلدیم.»
بو نعیمنینگ سوزلری دیر. اوشبو کیشی کابل شهرینینگ 13- ناحیهسی حاجی نوروز تورت یولیگه تیگیشلی منطقه اهالیسی تامانیدن اخلتلرنی تازهلش اوچون ایشچی تعیین ایتیلگن.
نعیمنینگ کوچهدن اوچ تایرلی موتر سایکلی بیلن اخلتلرنی ییغیب یورگن بیرچاغده کوردیم. اونینگ ایتیشیچه، هر بیر عایلهدن آییده 120 افغانی حقوق آلهدی. اونینگ ایتیشیچه، کمیده 200 عایلهنینگ اخلتلرینی ییغهدی.
کابل شهرینینگ باشقه منطقهلریگه هم شوندهی ایش بولگن و بولمهگنینی بیلیش اوچون باشکینتنینگ نیچه منطقهسیگه باش اوردیم.
کوپینچه کیشیلر بیلن اوچرهشدیم و اولرنینگ جوابی بو توغریده سلبی ایدی و بوندن سونگ، ارشاد بیلن اوچرهشدیم؛ او شاهشهید منطقهسینینگ اهالیسی دیر. اونینگ ایتیشیچه، شهردارلیک ایشلاوچیلری منطقهلرینی تازهلشگه قادر بوله آلمهگنی باعث، منطقه اهالیسی اخلتلرنی ییغیش اوچون بیر کیشینینگ مسؤول تعیین قیلگن.
ارشاد احمدگه کوره، بو ایش باعث، منطقهلری اخلتلردن تازهلنگن. اونینگ ایتیشیچه، تعیین ایتیلگن کیشی بیر کون اوته منطقه اخلتلرینی تازهلَیدی و آییده هر بیر اویدن 150 افغانی آلهدی.
فایقهنی قلعهی فتحالله منطقهسیده کوردیم. اونینگ ایتیشیچه، کابل شهردارلیگیگه همکارلیک قیلیش اوچون منطقه اهالیسی اویغونلیگیده اخلتلرنی ییغیش اوچون بیر کیشینی تعیین قیلگنلر. فایقه گه کوره، کابل شهرینینگ تازه سقلشده هر بیر اهالی فعال بولیشی لازم. « فعال بولمهگن صورتده، بوتون باشکینتنی تازهلش شهردارلیک کوچیدن آغیر دیر.»
اونینگ ایسلشیچه، تعیین ایتیلگن کیشیگه بیریلهدیگن پول کوپ ایمس دیر، لیکن باشقه بیر تاماندن اهالی اطرافی تازهلنیشیگه سبب بولهدی. او، مسؤوللردن اخلتلرنی ییغیش مسؤولیتینی خصوصی بولیمگه تاپشیریشینی سورهیدی.
اوشبو بیاناتلر باعث، شهردارلیک ریاستی سوزلاوچیسی جلیل سلطانی بیلن اوچرهشدیم. او، اخلتلر ییغیلیشیده شهردارلیک صفیدن تشقری کیشیلر تعیین ایتیلیشینی یشاوچیلرنینگ ابتکاری دیب بیلهدی. اونینگ ایتیشیچه، شهر تازهلنیشیگه یشاوچیلر قوشیلیشی آلقیشگه سزوار دیر و بو ایش شهر چیرایلیگیگه سبب بولهدی. سلطانی گه کوره، شهردارلیک باشکینت تازه سقلهنیشی اوچون شهرده اخلت تشلاوچی قوطیلرنی کوپهیتیرگن و شونینگدیک، اهالی اخلتلرینی اخلت تشلاوچی قوطیلرگه تشلهیدی.
سلطانینینگ ایتیشیچه، کابل شهردارلیگی نیچه وقت آلدین، «اوزیمیزدن باشلهیلیک» نامیده بیر برنامهنی یولگه قویدی و بو برنامهدن مقصد یشش محیط تازه سقلهنیشیده اهالی اشتراکی ایدی.
سلطانی بیلن بولگن سوزلشوو یکونلندی. کابل شهردارلیگیدن چیقه یاتگنیمده بوتون مملکت اهالیسی یشش محیط تازهلنیشیده اوزلریدن باشلشلرینی توشوندیم؛ اوزیمیزدن باشلهگنیمیزده یشش محیطمیز کمیده کیلهجک نسل اوچون یخشی بولیب قالیشی ممکن.
