تینچلیک بوییچه مصلحتی لویهجرگه 25 مادهلیک بیر شرطنامه ترقهتیش بیلن دولت قماقخانهسیده بولگن طالبان 400 اسیرینی آزاد قیلینیشی خصوصیده قرار قیلگن.
اوشبو جرگه اداغیده مملکت جمهور رئیسی محمداشرف غنی نینگ ایتیشیچه، تیزلیککه طالبان اسیرلرینی آزاد قیلینیش فرمانینی امضا قیلهدی.
جناب غنیگه کوره، تینچلیک بوییچه 4- مصلحتی لویهجرگه افغانستان نینگ 40 ییللیک اوروشینی یکونلنیشیگه سبب بولهدی.
جمهور رئیس نینگ ایتیشیچه، امینیتی رسمیلردن بیرقطاری وظیفهلرده غفلت قیلگنی باعث، قماققه آلینگنلر، بیراق تیزلیککه اولرنینگ قوییب یوباریلیش فرمانی صادر بولهدی. قماقخانهده بولگن امنیتی رسمیلرنینگ قوییب یوباریلیش موضوعی تینچلیک بوییچه مصلحتی جرگه نینگ ایکینچی کونیده جرگه اعضالری تامانیدن پیشنهاد قیلینگن ایدی.
تینچلیک بوییچه مصلحتی لویهجرگه باشلیغی عبدالله عبدالله، اوشبو جرگه قرارینی «تاریخی قرار» عنوان قیلگن. اونینگ ایتیشیچه، تینچلیک بوییچه مصلحتی لویهجرگه قراری افغانستان منفعتیگه دیر.
جناب عبدالله نینگ کوپهیتیریشیچه، امنیتی کوچلر تینچلیک بوییچه مصلحتی لویهجرگه جریانیده کوب قطار توطیهلرنی خنثا قیلگن.
تینچلیک بوییچه مصلحتی لویهجرگه باشلیغی نینگ کوپهیتیریشیچه، طالبان 400 اسیری قوییب یوباریلیشی بیلن تینچلیک سوزلشوولر برابریده بولگن بوتون بهانهلر و موانعلر یکونلنهدی.
مملکت سابق جمهور رئیس حامد کرزی ، تینچلیک بوییچه مصلحتی لویهجرگه یکونلنیشیده طالبان گروهیدن اوروشنی یکونلنتیریش بیلن افغانستانلیکلر ارا سوزلشوولرگه تیار بولیشینی ایستهگن.
تینچلیک بوییچه 4- مصلحتی لویهجرگه "جمعه" کونی باشلنگن ایدی. مملکت جمهور رئیسی محمداشرف غنی قربان هییتی نینگ بیرینچی کونیده طالبان 400 اسیری نینگ قوییب یوباریلیشی خصوصیده افغانستان یشاوچیلری قرار قیلهدی دیگن ایدی. جمهور رئیس غنی نینگ هردایم تاکید قیلیشیچه، اساسی قانونگه کوره، طالبان 400 اعضاسی نینگ قوییب یوباریلیشی خصوصیده اونینگ صلاحیتی یوق و بو توغریده تینچلیک بوییچه مصلحتی لویهجرگه آرقهلی، افغانستان یشاوچیلری قرار قیلهدی دیگن ایدی.
