شنبه‌دن یکشنبه گه اوتر کیچه سیاسی حزب‌لرنینگ باشلیغ‌لری و نماینده‌لردن بیرقطاری، کیله‌جک سیلاو خصوصیده، جمهور رئیس بیلن اوچره‌شگن‌لر. ایتیلیشیچه، سیاسی حزب‌لر تامانیدن آوازبیرووچیلر بایومتریک آرقه‌لی رویخط‌گه آلینیشی، سیلاولر سیستمه‌سی اوزگریشی و سیاسی حزب‌لر حضوریده سیلاولردن نظارت قیله‌دیگن کمیسیون ایجاد ایتیلیشی توغریسیده بولگن برچه تکلیف‌لر جمهور رئیس تامانیدن رد ایتیلگن.
اوشبو ییغین اشتراکچی‌لریدن بیری و افغانستان اسلامی جمعیت حزبی‌نینگ رهبرلیک کینگشی اعضاسی محی‌الدین مهدی‌نینگ سلام‌وطندارگه ایتیشیچه، ییغین جریانیده جمهور رئیس حزب‌لرنی تهدید قیلگن و حزب‌لر ایستک‌لری اوستیگه تأکید قیلگن صورتده، قانون اساسیده اولرنینگ ترقاقلشتیریشی‌نی بیلدیرگن. جناب مهدی گه کوره، مملکت باش قاره‌لاوچیسی فرید حمیدی هم قانون و قواعدگه قرشی بیر وسیله صفتیده ییغین گه اشتراک قیلگن ایدی.
محی‌الدین مهدی نینگ کوپه‌یتیریشیچه، جمهور رئیس برماق ایزینی رویخط‌گه آله‌دیگن 27 مینگ ماشین ساتیب آلیب آواز بیرووچیلرنینگ بایومتریک قیلیش گه قصد قیلگن. جناب مهدی گه کوره، سیاسی حزب‌لر بو ریجه‌نی قبول قیلمه‌گن؛ چونکه بو ماشین‌لر یالغیز حکومت‌نینگ اختیاریده بوله‌دی.
ایتیلیشیچه، سیاسی حزب‌لر و جمهور رئیس‌نینگ ییغینی جنجل بیلن یکونلنگن و سیاسی حزب‌لر اعتراضی شکلده ارگ نینگ کیچکی نانی‌نی ییمه‌ی و ییغین‌نی ترک قیلیشگن.
بیراق، جمهورلیک ریاستی‌نینگ سوزلاوچیسی‌نی اورین باسری شاه‌حسین مرتضوی، سیاسی حزب‌لر بیلن جمهور رئیس غنی‌نینگ یغینی‌نی ایجابی بیلیب ایتیشیچه، سیاسی حزب‌لر و حکومت قراری اساسیده، سیلاولرنینگ قیین‌چیلیک‌لری حل ایتیلیشی اوچون قوشمه بیر کمیته ایجاد ایتیلیشی ممکن.
بوندن آلدین، سیلاولر ایرکین کمیسیونی‌نینگ ایتیشیچه، نماینده‌لر کینگشی سیلاولری اوچون سیاسی حزب‌لرنینگ ایستک‌لری و تکلیف‌لری تطبیق ایتیلمه‌یدی؛ بیراق جمهورلیک ریاستی سیلاویده بو ایستک‌لر عملی بوله آله‌دی.
