هرات ولایتینینگ خوفسیزلیک قومندانلیگینی ترورچیلرگه قرشی کورهش عمومی مدیری فضلالرحمن خادمنینگ ایتیشیچه، هرات ولایتیده یوز بیرگن سِرلی سوءقصدلرگه مذکور ولایت بوییچه ایران باش قنسولی محمودافخمی رشیدینینگ قولی بار.
اونینگ ادعا قیلیشیچه، ایران باش قنسولی مذکور مملکتنینگ پاسدارلر سپاهی بیلن بیرگه سوءقصدلرنی رهبرلیک قیلیب و ریجهلیدی.
هرات ولایتینینگ خوفسیزلیک قومندانلیگینی ترورچیلرگه قرشی کورهش عمومی مدیرینینگ ایتیشیچه، اوشبو مسؤولیت باشلنگنیدن بویان ترورچیلیک واقعهلر توغریسیده 134 کیشی قولگه آلینگن و اولردن 4 تهسی ایران اهالیسی ایکن.
اونگه کوره، مذکور کیشیلردن کوپینچهسی ایران پاسدارلر سپاهی تامانیدن بویروغ آلیب تانیقلی شخصیتلر و امنیتی کوچلرنینگ اوستیلریگه سوءقصد قیلگنلر.
اونینگ کوپهیتیریشیچه، هرات ولایتیده سونگی نیچه ییلده یوز بیرگن سوءقصدلرنی اوستیدن اوتکزیلگن تیکشیروولرگه کوره، اوقلر مهارتلی شکلده کیشیلرنینگ یورهگی و باشینی نشانگه آلگن.
خادمنینگ کوپهیتیریشیچه، ایران پاسدارلر سپاهی بو کیشیلرگه تعلیمات بیرگنیدن سونگ، هر بیر کیشینینگ سوءقصدی بدلیده اولرگه 100 مینگ کلدار بیریب و عیبلاو برماغی پاکستان گه قرهتیلیشینی ایستهگن.
اونگه کوره، ایران پاسدارلر سپاهی هراتده بولگن آدملریگه بویروغ بیریب هر بیر ترورچیلیک عملیدن سونگ شایعه چیقاریب و اونی داعش بوینیگه تشلشلرینی ایستهگن.
اوشبو امنیتی رسمینینگ اورغولشیچه، هرات ولایتیده هر بیر عمومی پروژه آچیلگنیدن سونگ، مذکور ولایتده اهالی و سرمایه یاتقیزووچیلرگه قورقینچ ایجاد ایتیلیشی اوچون ایران بویروغی بیلن ترورچیلیک واقعهلر کوپهیگن.
خادمنینگ آگاهلنتیریشیچه، حکومت رهبرلری بو قضیه گه جدی شکلده دقت قیلمهگن صورتده، ایران ارهلشوولری برابریده یشاوچیلر قیام قیلیشی ممکن.
اونینگ ایتیشیچه، هرات ولایتیده ایران باش قنسولی محمود افخمی رشیدی دن محکمه گه شکایت قیلگن.
عین حالده، سیاسی ایش بیلرمانلر و هرات ولایتی کینگش اعضالریدن بیرقطاری هم قوشنی مملکتلرنینگ افغانستان ایچکی ایشلریگه ارهلشیشلرینی تصدیقلب ایتیشیچه، اوشبو ولایت سوءقصدلریدن کوپینچهسی سیاسی و اقتصادی هدفلر اساسیده عملگه آشیریلهدی.
شوندهی بیرحالده، هرات حاکمینی سوزلاوچیسی جیلانی فرهادنینگ ایتیشیچه، بو توغریده هر قندهی ادعا بولگن صورتده، قانون اساسیده تیکشیریلهدی.
عین حالده، هرات ولایتی بوییچه ایران قنسولی رسمیلریدن بیری علیاکبرنینگ ایتیشیچه، بو ادعالردن خبر ایتیلگنلر و اولر رسمی توشونچهلرینی ادعالر تیکشیریلگنیدن سونگ، اعلان قیلهدی.
ایتیش کیرهک کیم، اوتگن پنجشنبه کونی هرات ولایتینینگ ترورچیلرگه قرشی کورهش عمومی مدیرینینگ ایناغهسی و پولیس افسری هرات شهرینینگ مرکزیده ترور ایتیلدی و شونینگدیک، باشقه بیر ایناغهسی نیچه آی آلدین ترور ایتیلگن ایدی.
