افغان ولسمشر محمد اشرف غني وايي، چې د مجرمو اشخاصو تبادله د افغان حکومت په سياست کې ځای نه لري او حکومت به هيڅکله داسې متهمین تبادله نه کړي، چې د محاکمو له لوري مجرم پېژندل شوی وي او دوی يې د اشخاصو په بدل کې مبادله کړي.
نوموړي د يوې خبري ناستې په ترڅ کې خبريالانو ته وویل، چې د ۳۱ برمته شويو افغانانو له ډلې د ۱۹ تنو د ازادېدو له کبله افغان حکومت خوشحاله دی او امنيتي چارواکي د پاتې برمته شويو د خلاصون په لټه کې دي.
ولسمشر دا هم وویل، چې د برمته شویو کسانو د ازادېدو له پاره د حکومت له لوري هيڅ ډول پېسې نه دي ورکړل شوي.
افغان ولسمشر زياته کړه، چې د ځينو پېښو په هکله د حکومت سکوت د بې پروايۍ نه بلکې د تعهد په معنی ده.
ده وویل، چې د برمته شويو کسانو د خلاصون په موخه د لومړي ورځ نه تر اوسه پورې شخصاَ په جدي اقداماتو لاس پورې کړی.
افغان ولسمشر د افغانستان اوسني امنيتي حالاتو ته په اشارې سره وویل، ده د خپل حکومت پېل کې ويلي و، چې سږکال به سخت کال وي او د داشان پېښو څخه باید درس واخلو.
نوموړي د ۳۱ مسافرو د خوشې کېدو په مناسبت خبري ناستې ته زياته کړه، چې امنيتي مسایل تدبير او حوصلې ته اړتيا لري.
پوره ۷۸ ورځې وړاندې د کابل ـ کندهار پر لويه لاره د زابل په سيمه کې شاوخوا ۳۱ تنه مسافر د نامعلومو وسله والو له لوري برمته شول.
د برمته کېدو څخه څو ورځې وروسته ډيری هېوادوالو د برمته شويو مسافرو د خلاصون په موخه لاريونونه وکړل او د اعتراض په توګه يې د کابل په ښاروالۍ کې يې خيمې ولګولې.
نن دوشنبه ( ۲۰۱۵ زېږدیز/ مې ۱۱) سلام وطندار له لوري د لومړي ځل له پاره راپور خپور شو، چې د ۳۱ برمته شويو وګړو له ډلې ۱۹ تنه يې ازاد شول.
دا لا د حکومت له لوري تایید شوې نه ده، چې د برمته شويو وګړو په تبادله کې د حکومت له لوري د مخالفو وسله والو کوم شرطونه منل شوي او کوم کسان يې پر ځای خوشې شوي دي.
خو سلام وطندار ته را رسیدلي راپورونه وايي، چې د برمته شويو مسافرو پر ځای افغان حکومت یو شمېر چيچني، ازبکستاني او نورو اتباع خوشي کړي دي.
د غزني د ولايتي شورا غړی حسن رضا یوسفي سلام وطندار ته د پورته خبر د تایید ترڅنګ ويلي، چې دغه کسان د غزني او زابل ترمنځ په پرتو کلو کې تبادله شوي دي.
