مبارک روزه آیی باشلنگندن بیری، غزنیده تورت پولیس عسکر آتیب اولدیریلگن.
غزنی والیسی نینگ سوزلاووچیسی شفیق الله ساپی، مذکور ولایتده ترورچیلیک فعالیتلر کوپیگنینی تصدیقلب، سلام وطندارگه ایتیشیچه، بوگون یکشنبه ایرتهلب غزنی شهردارلیگینی بیر قوروقچیسی موترسایکلگه مینیلگن قوراللی کیشیلر آرقهلی پولیسنینگ ایکینچی حوزهسی گه تیگیشلی منطقه ده اوققه توتیلیب هلاک ایتیلگن.
شونینگدیک غزنی والیسی سوزلاووچیسی نینگ کوپیتیریشیچه، اوتکن کون کیچ قورون ایکی امنیتی عسکر پولیسنی اوچینچی حوزهسی گه تیگیشلی منطقهده قوراللی کیشیلر هجومی نتیجهسیده تن جراحتی آلیب، شفاخانهگه ییتکزیلگندن کیین حیاتدن کوز یومگن.
عینحالده، غزنی ولایتی امنیه قوماندانلیگی نینگ خوفسیزلیک آمری اسدالله انصافینینگ سلام وطندارگه ایتیشیچه، بو قوماندانلیکنی بیر منصبداری روزه نی بیرینچی کونی 28- جوزا ده ناتانیش قوراللی کیشیلر تامانیدن اوققه توتیلیب اولدیریلگن.
مذکور ولایت حربی رسمیلری و غزنی والیسی سوزلاووچیسی، حاضرگه قدر واقعهگه قولی بارلیککه گمان سیرهلب هیچ بیر کیشی حبسگه آلینمهگن لیگینی ایتگن.
اوشبو ترور حادثهلری نینگ کوپچیلیگی سیسسیز تفنگچهلر آرقهلی عملگه آشیریلگن.
شونینگدیک اوتکن ییل مبارک روزه آییده غزنی یشاووچیلریدن 15 تهسی سیس تفنگچه آرقهلی شهر ایچیده آتیب اولدیریلگن ایدی.
