سلام‌وطندارگه صحبت بیرگن غزنی ولایتی‌نینگ جاغوری تومنی جهادی قومندانلریدن بیری جنرال حبیب‌الله نینگ ایتیشیچه، جاری ییل کوکلم موسومی باشله‌نیشی بیلن اوزبیک جنگریلر آغیر و یینگیل قوراللر بیلن جهازلنیب خاک افغان تومنیده داعش گروهی‌نینگ بیره‌قی آستیده اردو قوریب و غزنی ولایتی‌نینگ ناوه، مقر، گیلان و قره‌‍باغ تومنلرده عسکر آلماقده.
او، دولت کوچلریدن حمایت قیلیش اوچون زابل ولایتی‌نینگ خاک افغان و غزنی ولایتی‌نینگ ناوه تومنی اطرافیده نیچه حربی پوسته قورگن. اونینگ ایتیشیچه، مذکور گروه‌نینگ برچه فعالیتی و مرکزلری نظارت آستیده دیر؛ بیراق او، اوروش باشله‌نیشی‌نی ایستمه‌یدی.
جنرال حبیب‌الله گه کوره، اونینگ بویروغیده بولگن کیشی‌لر، داعش گروهی‌نینگ حربی حرکتی گه قرشی جواب بیره‌آله‌دی.
اونگه کوره، داعش جنگریلری پاکستان توپراغیدن افغانستان گه کیره‌دی و اوندن سونگ، ناوه و خاک افغان تومن‌لریده جایلشه‌دیلر.
جنرال حبیب‌الله نینگ کوپه‌یتیریشیچه؛ مذکور گروه نینگ اصلی مقصدی توغریسیده حاضرگچه دقیق معلومات قولگه کیریتمه‌گن؛ بیراق جاغوری، مالستان، گیلان تومن‌لری و زابل‌نینگ ایریم منطقه‌لری مذکور گروه تامانیدن هدف آلینیشی ممکن.
باشقه تاماندن، زابل ولایت کینگشی اورین باسری اسدالله کاکر و غزنی ولایت کینگشی اعضاسی خالق داد اکبری، زابل ولایتی‌نینگ خاک افغان و دای‌چوپان تومن‌لریگه تیگیشلی منطقه‌لرده داعش جنگریلری‌نینگ کینگ فعالیتی‌نی تصدیق‌لیدیلر.
شونینگدیک، اولرنینگ اورغولشیچه، داعش گروهی اعضالری پاکستان توپراغیدن افغانستان گه کیره‌دی و آتی آلینگن تومنلرده حربی تعلیمات کوره‌دیلر؛ او ییردن باشقه ولایت‌لر جمله‌دن ارزگان یوباریله‌دی.
غزنی ولایت کینگشی‌نینگ نماینده‌لریگه کوره، بو گروه نینگ مقابلی‌ده دولت حاضرگچه تینچ تورگن و مذکور گروه نینگ مرکزلریگه قرشی هیچ قنده‌ی ایش قیلمه‌گن.
بیراق، غزنی پولیس قومندانی جنرال محمد زمان نینگ ایتیشیچه، مذکور ولایتده داعش گروهی نینگ فعالیتی توغریسیده اولرگه هیچ بیر گزارش کیلمه گن.
شونینگدیک، ایکی ییل آلدین چیت ایللیک جنگریلر داعش گروهی نینگ بیره قی بیلن ایسلنگن تومنلرده فعالیت قیلیب و قنچه یولاوچیلرنی گروه گه آلگن ایدی؛ بیراق طالب لر آتیشگنیدن سونگ، منطقه نی ترک قیلگن.
