غزنی معارف ریاست مسؤول‌لری، مذکور ولایت شهریده اوقیتووچیلر اوچون ییر ترقه‌تیلیشی باشلنگنیدن خبر بیره‌دی.
اوشبومسؤول‌لرگه کوره، بو دورده 2021 اوقیتووچی اوچون ییر بیریله‌دی.
غزنی معارف باشلیغی محمدعابد عابدنینگ ییر ترقه‌تیش مراسمی‌ده ایتیشیچه، بیرمینگ جریب ییر ترقه‌تیشگه تیار و باشقه 2 مینگ جریب ییر یقینده اوقیتووچیلر اختیاریگه قوییله‌دی.
عین حالده، بیرقطار اوقیتووچیلرنینگ ایتیشیچه، 13 ییل کوتیش‌دن کیین، مذکور ولایت معارف رسمی‌لری تمانیدن اوقیتووچیلر اوچون ییر ترقه‌تیش برنامه‌سی تطبیق ایتیلیش‌گه تیارلندی.
غزنی معارف باشلیغی‌نینگ ایتیشیچه، بو ییرلر 15 ییلدن آرتیق تعلیم بیریب متقاعد بولگن اوقیتووچیلر، ایکی ییلدن آرتیق مکتب‌لرده رسمی صورتده درس بیرگن اوقیتووچیلر و معارف ریاستی‌نینگ بیرقطار ایشلاوچیلری‌گه ترقه تیله‌دی.
شونینگ‌دیک جناب عابدنینگ ایتیشیچه، غزنی ولایتی‌ده 2700 اوقیتووچی موجود و بو اوقیتووچیلرنینگ برچه‌سی سونگی ییل‌لرده مذکور برنامه گه شامل بوله‌دی.
اونینگ کوپه‌یتیریشیچه، معارف ریاستی کیله‌جک ییل‌لرده ولایت جاغوری و اندر تومن‌لری‌نینگ اوقیتووچیلری اوچون ییر ترقه‌تیلیشی‌گه قرار قیلگن.
غزنی ولایتی‌نینگ اوقیتووچیلری بو لایحه باشله‌نیشی‌نی خوش کوتیشی‌گه قوشیمچه، بو ییرلر تونیق صورتده ترقه‌تیلیشی‌نی سوره‌گن.
مملکت جمهور رییسی محمداشرف غنی، جمهورلیک ریاستی بیرینچی کون ایشلری‌ده، ایشی‌نینگ آلتی آی باشله‌نیشی‌ده مملکت بویلب اوقیتووچیلر اوچون ییر ترقه‌تیشی‌نی ایتکن ایدی.
اونینگ جمهورلیک ریاستی‌دن 8 آی اوتکنیدن کیین، انچه پیت آلدین کابل اوقیتووچیلریدن بیرقطاری حکومت‌نی دقت‌سیزلیک‌که عیب‌لب ناراض‌لیک بیلدیریب، درس بیریش‌دن وازکیچدیلر. اولرنینگ ایسته‌کلریدن بیری اوقیتووچیلر اوچون ییر ترقه‌تیلیشی ایدی.
دیمک معارف وزیرلیگی، اوقیتووچیلرنینگ بو حرکتی‌دن چمه‌سی بیر آی اوتکنیدن کیین، اولرنینگ برچه ایسته‌کلری‌گه ییتیشی‌نی ایتیب و اولردن ناراض‌لیکلری‌نی یکونلنتیریشی‌نی سوره‌دی.
