د اوبو او برېښنا پخواني وزیر علياحمد عثماني نن کابل کې یوې خبري غونډې ته وویل، ولسمشر د سپکاوي، تحقیر، وېرې او ګواښونو فضا په رامنځته کولو سره د کابینې وزیران د خپلو لیدلورو د اورلو پرځای سکوت غوره کوي.
د ښاغلي عثماني په وینا، حکومت خلاقیت تر پښو لاندې کړی او ان د حکومت له لوړ پوړیو چارواکیو نه یې د ازادۍ حق اخېستی دی.
د ده په خبره، وزیران ځکه د نظر څرګندونه نهشي کولی چې د دندې نه د لېرې کېدو وېره ورسره وي.
ښاغلی عثماني ادعا کوي چې د اوبو او برېښنا وزارت د سلاکارانو په دفتر کې یوه ډله یوازې د دې لهپاره ګومارل شوې چې د دې وزارت په چارو کې لاسوهنه وکړي.
د اوبو او برېښنا پخوانی وزیر ټینګار کوي چې د هغه له بېواکه کېدو وړاندې د ولسي جرګې له لوري د ده استیضاح پلان شوی کار و.
ښاغلی عثماني له نړۍوالې ټولنې غواړي چې د افغانستان حکومتي بنسټونو کې د فساد څېړلو لهپاره یو باوري بنسټ ته دنده وسپاري.
هغه همدارنګه له ولسمشره غواړي، د ولسمشرۍ ماڼۍ سترې دندې په سمه توګه وپېژني او په بېځایه کارونو خپل وخت تېر نهکړي.
ومو غوښتل د علياحمد عثماني د ادعا په اړه د ولسمشرۍ ماڼۍ لیدلورۍ هم واخلو؛ خو بریالي نهشو.
