بوگون "یکشنبه" ملی مصالحه کینگشی باشلیغی عبدالله عبدالله نینگ قطر باشکنتی دوحه‌ده خبر بیر ییغین اوتکزیب ایتیشیچه، اوتگن کوندن بویان مذاکره قیلیووچی هیات‌لر آره‌سیده اوچره‌شوولر باشلنگن و دوام قیلماقده.
جناب عبدالله نینگ کوپه‌یتیریشیچه، افغانستان یشاوچی‌لری سوزلشوولر جریانیده زوروانلیک‌لر یکونلنتیریلیشی‌نی ایسته‌یدیلر.
ملی مصالحه کینگشی باشلیغی نینگ تاکید قیلیشیچه، قطر ییغینیده افغانستان شریکلری، خلق ارا جماعه‌سی و حمایت قیلیووچی نهادلر نینگ پیامی بیللی ایدی و اولر تینچلیک سوزلشوولر و زوروانلیک کمه‌یتیریلیشیدن حمایت قیلگنلر.
طالبان گروهی ده یقین سیمالردن بیری سیداکبر آغا نینگ سلام‌وطندارگه ایتیشیچه، مذاکره قیلیووچی هیات‌لر آره‌سیده تماس گروهی سیله‌نیشیدن سونگ، اولویت‌لر و اونملی موضوع‌لر خصوصیده صحبت‌لر باشلنه‌دی. اونینگ ایتیشیچه، بیرینچی دور سوزلشوولرده آتیش‌کیسین خصوصیده کیلیشوو صورت تاپیشی ممکن.
قطرده تینچلیک سوزلشوولرنینگ باشله‌نیشی ییغینی اوتکزیلگن بیرحالده، افغانستانده اوروش‌لر کوپه‌یگن. ملی مدافعه وزیرلیگی نینگ اعلان قیلیشیچه، اوتگن بیر کیچه و کندوز ده طالبان جنگری‌لری مملکت 19 ولایتیده هجوم قیلگن و دستلبکی معلومات‌لرگه کوره، امنیتی کوچلردن 20 ته‌سی هلاک و باشقه 20 ته‌سی یره‌لنگن.
عین‌حالده، بیلیم یورت اوقیتووچی‌لریدن بیری صلاح‌الدین قاریزاده نینگ ایتیشیچه، آتیش‌کیسین افغانستان یشاوچی‌لری نینگ اساسی ایستک‌لریدن دیر و طالبان تامانیدن دقت قیلینیشی کیره‌ک. اونینگ ایتیشیچه، سوزلشوولر جریانیده اوروش نینگ دوام قیلیشی اوشبو تینچلیک جریانی‌گه زیان ییتیشتیره‌دی.
