عالی تحصیلات وزیری، ینگی تقنینی فرمان عملی ایتلیشی بیلن بیلیم یورتنینگ 134 اوقیتوچیسی تقاعدهگه چیقهدی دیگن.
افغانستان عالی تحصیلات وزیری خانم داکتر فریده مومند اوشبو سوزلرنی بوگون سنا مجلسینینگ استجوابیه ییغینیده قیلگن چیقیشده تیلگه آلیب، تیزلیکده اوقیتوچیلر معماسی حل ایتیلهدی دیگن. خانم مومند، بو مساله بارهسیده مملکت جمهور رییسی بیلن هم اوچرهشیب صحبت قیلگنینی ایتگن. اونگه کوره، و جمهور رییس اوزی استاد لر بیلن یقیندن کوریشیب ملاقات قیلهدی.
عالی تحصیلات وزیری ینگی قانوننینگ طرحلری کوپراق کابل بیلیم یورتی استادلری مصلحتی اساسیده تیارلنگن دیگن. او، تقاعد ییلی 65 ییل دیب و شونگه اوخشهگن ایریم موضوعلر بارهسیده وزیرلر کینگشی طرحی سیغدیریلگنینی بیلدیرگن.
کابل بیلیم یورتینینگ قطار استادلری جمهور رییس غنینینگ تقنینی فرمانی اساسیده عالی تحصیلات وزیرلیگینینگ ینگی لایحهسی تصدیقلنگندن سونگ، ایش تشلب اوقوچیلرنینگ سونگی سمستر سیناوی آلینیشیدن قول تارتگن ایدیلر.
اما، خانم مومند ینگی قانون طرحی بیلیم یورت استادلرینینگ مصلحتی اساسیده تیارلنگن دیگن. اونگه کوره، وزیرلر کینگشی تقاعد مسالهسی و باشقه نیچه موضوعگه اوزگریش کیلتیرگن. اوشبو قانونگه موافق بوندن بویان 65 یاشگه تولگن استادلر تقاعدگه چیقهدی.
تحصیلات وزیریگه کوره، هنوز گچه کابل بیلیم یورتینینگ اوچ فاکولتهسی سونگی سمسترینینگ سیناوی آلینمهگن.
عین حالده، افغانستان عالی تحصیلات وزیری 700 اوقیتوچیدن عبارت آلتی آیده ترفیع قیلمهگن استادلر همده تقاعدگه چیققن استادلر توغریسیدهگی میش – میشلرنی رد قیلیب، اوشبو وزیرلیک استادلر قابلیتی آشیریلیشی اوچون لازم درجهده زمینه یرهتگنلیگینی بیلدیرگن.
شونینگدیک مملکت عالی تحصیلات وزیری جاری ییل مملکت بویلب سیناو کانکوری آلدینگی ییللرگه کوره شفاف صورتده اوتکزیلیشی حقیده ایشانچ بیرگن.
باشقه تاماندن خصوصی عالی تحصیلات موسسهلرینینگ باشلیغی محمدامیرکامهوالنینگ سوزلریگه کوره، خصوصی بیلیم یورتلر اوچون ینگی طرح تیارلنگن و بو لایحه تصدیق لهنیشی بیلن مذکور بیلیم یورتلرده بولگن کته معمالر حل ایتیلهدی.
شونینگدیک کامهوال، دولت و شخصی بیلیم یورتلر اورتهسیدهگی حجتلرگه فرق بیریلسملیگی لازم دیگن.
عین حالده جناب کامهوال، 100 دیپلم آلمانده چاپ آستیده و اونینگ 50 مینگی ایسه جاری ییل دلو آییگه قدر افغانستانگه کیلتیریلهدی دیگن.
