ننگرهار ولایتی اچین تومنی‌نینگ ولسوالی حاجی‌غالب، نماینده‌لر مجلسی‌نینگ بیرینچی اورین باسری محمدظاهر قدیرگه وفادار قوراللی شخص‌لر اوتگن کون (شنبه) داعش جنگری‌لرینی قول‌گه آلیب تورته‌سی‌نینگ باشی کیسیلیب اولدیریلگنی باره‌سی‌ده خبر بیرگن.
جناب‌غالب‌نینگ سلام‌وطندارگه ایتیشیچه، باشی کیسیلگن‌لردن ایکّی کیشی‌سی «تیرا» قبایلی منطقه یشاووچی‌سی و باشقه ایکّی ته‌سی ایسه پاکستان ایجنسی اورکزی منطقه‌سی اهالی‌سی بولگن.
اچین تومنی ولسوالی، باشی کیسیلیب اولدیریلگن‌لرنینگ جسدی ظاهر قدیرگه وفادار قوراللی شخص‌لر قرارگاهی یقینی‌ده بولگن لیگی‌نی بیلدیرگن.
عین حالده، بوندن بیر کون آلدین داعش گروهی ملی مجلس بیرینچی اورین باسری‌گه وفادار کیشی‌لردن تورت نفرنی باشینی کیسیب اولدیرگن ایدی.
جناب قدیر، اوتگن آی بیرینچی کون‌لرده افغانستان ملی امنیت کینگشی و برچه خوف‌سیزلیک مسوول‌لرنی داعش‌دن حمایت قیلیش‌لیک‌که عیب‌له‌گن ایدی. شونینگ‌دیک جناب قدیر، داعش‌نینگ بلند مرتبه‌لی رسمیلری کابل‌ده استقامت قیله‌دیلر دییه معلوم قیلگن ایدی.
افغانستان حکومتی‌نینگ یوقاری مرتبه‌لی رسمیلری جناب قدیرنینگ بو قبیل سوزلرینی رد قیلیب، اونی ملیشه توزیش‌گه عیب‌له‌گن ایدیلر.
ملی مجلس بیرینچی اورین باسری‌نینگ مذکور ادعاسی‌دن سونگ، نماینده‌لر مجلسی‌نینگ قطار اعضالری اوندن بو توغریده حجت ارایه قیلیش‌نی سوره‌گن ایدیلر. لیکن، جناب قدیر قولی‌ده بولگن حجت‌لرنی مجلس‌گه بیرگن و بیرمه‌گنی انیق‌لنمه‌دی.
شونینگ‌دیک ایریم گزارش‌لرده اوتگن هفته‌لرده نا تانیش ایکّی اوچاق ولایت‌نینگ سرخ‌رود تومنی‌گه داعش گروهی اعضالرینی ییتکزگنی قید ایتیلگن ایدی.
عین حالده، بادغیس ولایتی‌نینگ محلی بلند مرتبه‌لی رسمیلری هم اوتگن آی جریانی‌ده نا معلوم اوچاق‌لر آرقه‌لی بالامرغاب تومنی‌نینگ «چب‌قول» منطقه‌سی‌ده قوراللی شخص‌لر توشیریلگن لیگی‌دن خبر بیرگن ایدیلر.
