د افغانستان فوټبال فدراسیون له خوا د خپرې شوې خبرپاڼې له مخې، طاهر روفي تېرکال د پاکستان په کوربتوب د الف یا (ای) درجې روزنیز کورس په بریالیتوب سره پای ته ورساوه، چې نن ورته د فوټبال اسیایي شورا د ښووونکي نادر عربي له خوا د ترټولو سترې (الف) درجې سند په کابل کې ډالۍ شو.
طاهر روفي، چې اوسمهال د افغانستان په فوټبال فدراسیون کې د (تخنیکي) برخې مسوول هم دی د هیواد په کچه یو مخکښ روزونکی هم شمیرل کیږي.
د افغانستان فوټبال فدراسیون خبرپاڼه زیاتوي، چې طاهررووفي د اسیا فوټبال شورا له خوا د لومړۍ درجې روزنې سند ترلاسه کړ او په دې سره د افغانستان په کچه مخکښ روزونکی شو.
له طاهر رووفي وړاندې یواځې د افغانستان فوټبال ملي لوبډلې پخوانی روزونکی او د فوټبال فدراسیون اوسنې فني مرستیال یوسف کارګر دغه سند په واک کې درلود.
ویل کیږي، چې د اسیا د لومړۍ درجې روزنیزکورس کې د بریالیتوب او سند اخیستلو وروسته طاهر رووفي د افغانستان فوټبال ملي لوبډلې او دغه راز د نړیوالو فوټبال لوبډلو کوربتوب کولای شي.
د اسیا په کچه د مخکښو فوټبال لوبې روزونکو له پاره د لومړۍ درجې روزنې سند ترلاسه کولو په موخه روزنیز کورس د تیر۲۰۱۵ م ز کال "می" میاشتې له لومړې نیټې څخه تر ۲۷ مې نیټې دوام وکړ.
یاد روزنیز کورس د فوټبال اسیایي شورا په نوښت او د پاکستان فوټبال فدراسیون په مرسته په لاهور ښار کې ترسره شو، چې په کې ګډون کوونکو عملي او نظري زده کړې ترلاسه کړې.
د لومړۍ درجې روزنې سند ترلاسه کولو په موخه داسیا په روزنیز کورس کې طاهررووفي د افغانستان له خوا یواځینی ګډون کوونکې روزونکی وو.
دغه راز په کابل بیا د اسیا فوټبال فدراسیون د ښوونکي نادرعربي له خوا د هیواد د ۷ ولایتونو څخه غوره شویو ۱۹ روزونکو ته د دویمې یا (بي) درجې روزونکو له پاره د ۳ اونیو کورس د سندونو په ویشلو سره پای ته ورسید.
د فوټبال اسیایي شورا ښوونکي نادر عربي رسنیوسره په خبرو کې وویل، د دې ترڅنګ یې چې د ۲۱ ورځو له پاره په افغانستان کې راتلونکی روزونکي وروزل ترڅنګ یې له افغانانو څخه هم ډير څه زده کړل او په خوښۍ سره خپل هیواد ته ستنیږي.
