پکتیا محلی رسمی‌لری‌نینگ ایتیشیچه، بوگون ایرته‌لب جنگری طالب‌لر اونلرچه یولاوچی تینچ اهالینی ولایت سید کرم تومنی‌دن اوغیرلگن.
پکتیا ولایتی کینگش منشی‌سی محمدرحمان قادری‌نینگ سلام‌وطندارگه ایتیشیچه، ولایت سید کرم تومنی‌نینگ «بدم» منطقه‌سی یولاوچی‌لریوزیگه تورت ساعت‌گه قدر یول یاپیلیب، 30 گه یقین موترنی توتیب، یولاوچیلرینی اوزلری بیلن بیرگه آلیب کیتگن.
ولایت امنیتی رسمی‌لری مذکور حادثه‌نی تأیید قیلیب، یولاوچی‌لردن کوپی سی‌نی طالب‌لر اوزلری بیلن بیرگه آلیب کیتگن‌لیگی‌نی بیلدیره‌دی.
پکتیا پولیس باشلیغی زلمی اوریاخیل‌نینگ ایتیشیچه، اوغیرلنگن یولاوچیلر ارا باله‌لر و عیال‌لر هم موجود؛ بیراق یولاوچیلر سانی توغری سیده بیرنرسه دیمه‌دی. اوریاخیل‌نینگ کوپه‌یتیریشیچه، امنیتی کوچلر یولاوچی‌لرنی قویب یوباریش اوچون محل‌ده بارگنلر.
مذکور واقعه مسؤولیتی‌نی طالب‌لر اوز بوینیگه آلگن. بوگروه سوزلاوچی‌سی ذبیح‌الله مجاهدنینگ سلام‌وطندارگه ایتیشیچه، اولر مذکور یولاوچی‌لردن 19 ته‌سی دولت ایشلاوچی‌لریدن بولگن‌لیگی‌گه شک قیلگن.
مجاهدنینگ کوپه‌یتیریشیچه، حاضرگه قدر یولاوچی‌لردن 8 ته‌سی دولت ایشلاوچی‌لریدن‌لیگی ثابت بولگن و قالگنی هم تانیلگن‌دن کیین، یولاوچیلر قویب یوباریله‌دی.
شونینگ‌دیک نیچه آی آلدین هم جنگری طالب‌لر شومنطقه‌ده «سمکنی» تومنی‌نینگ باشلیغی‌نی اوق بیلن اولدیرگن ایدی.
سید کرم پکتیا ولایتی‌نینگ ناتینچ محله‌لریدن سنله‌دی و بومحله‌لرده طالب‌لر یاشیرینچ فعالیت قیلیب اوزلریگه اورین آلگن.
