اوتگن «پنجشنبه کیچه» مرکزی بغلان تومنینینگ قندهارلر قیشلاغی اوستیگه قوراللی طالبلر هجوم اویوشتیریب، مذکور تومن یشاوچیلریدن اوچ کیشینی دولتگه همکارلیک قیلیشگه عیبلب، عایلهلرینی حضوریده آتیب اولدیرگن.
بغلان امنیه قومندانی عبدالرشید بشیرنینگ سلاموطندارگه ایتیشیچه، مذکور اوچ کیشینینگ حکومت و امنیتی ادارهلر بیلن هیچ قندهی علاقهسی بولمهی و یالغیز ایکینچیلیک ایشلری بیلن شغللنهدی ایکنلر.
جناب بشیرنینگ ایتیشیچه، قوراللی طالبلر نظارتیده بولگن منطقهلرده هیچ بیر زورهوانلیک و جنایتدن وازکیچمهی و خاص قانونلرینی خلق اوستیگه عملگه آشیرهدی. جناب بشیرگه کوره، شونینگدیک نیچه کون آلدین، بغلان ولایتینینگ بُرکه تومنی تنگی مورچ منطقهسیده قوراللی طالبلر ایکی کیشینی دارگه آسگن ایکن.
ایتیش لازم، حاضرگی کونلرده بغلان ولایتینینگ دندغوری، دندشهابالدین منطقهلری، مرکزی بغلان تومنینینگ ایریم منطقهلری، بُرکه تومنینینگ تنگی مورچ منطقهسی، دهنه غوری، دوشی و تالهو برفک تومنلرینینگ ایریم قسمتلریده قوراللی طالبلر کینگ شکلده فعالیت قیلهدیلر؛ مذکور منطقهلرده قانونلرینی عملگه آشیریب و خلقدن باج آلهدیلر.
