چهارشنبه کون ایرتهلب طالبلر فاریاب- بادغیس قتناو یولیده اوچ پولیسنینگ باشینی کیسگن. اوشبو اوچ پولیس ایکی کون آلدین قیصار تومنی چهلگزی منطقهسیده توتقونگه آلینگن ایکن.
قیصار تومنینینگ سرپرستی عبدالجمیل صدیقی واقعهنی تأیید قیلیب سلاموطندارگه ایتیشیچه، مذکور اوچ پولیس ایکی کون آلدین چهلگزی بازاریدن قیصار تومنی مرکزی تامان کیتهیاتکن بیرچاغیده طالبلرنینگ قولیگه توشگنلر.
اونینگ ایتیشیچه، بو پولیس مأمورلر، شخصی موتر بیلن سفر قیلگن ایکن.
جناب صدیقیگه کوره، طالبلر باشی کیسیلگن اوچ پولیسنینگ جسدینی چهلگزی منطقهسی یول یانیده تشلهگن ایکن و قوم بویوکلری جسدلرنی انتقال بیریش اوچون محلده بارگنلر.
فاریاب- بادغیس شاه یولی قطعه قومندانی حیاتالله سرخابی، مذکور اوچ پولیسنینگ اولیمینی تأیید قیلیب، کوپهیتیریشیچه، اولر رخصت سیز شخصی موتر بیلن سفر قیلگنلر.
اونینگ ایتیشیچه، بو پولیسلردن 2 تهسی کوهی قیصار قیشلاغی یشاوچیلری و باشقه بیری میمنه شهری اهالیسی ایکن.
شونینگدیک اوچ کون آلدین، ایکی پولیس فاریاب- بادغیس قتناو یولیده طالبلر بیلن اوروشیب جان بیرگن ایدی. فاریاب ولایتینینگ کوپینچه منطقهسی سونگی کونلرده طالبلرنینگ هجوملریگه گواه بولگن. ایریم پیتلرده مذکور ولایت امنیتی پوستهلر اوستیگه طالبلر هجوم اویوشتیریشی توغریسیده گزارشلر ترقهتیلگن.
