اوروش دوامی بولگن مملکتلرده یره‌شنی تامین قیلیش بوییچه فعالیت قیله‌دیگن پگواش خلق ارا تشکیلاتی قطر و کابل‌دن سونگ اوتگن کون پاکستان نینگ اسلام آباد شهریده ییغین اوتکزدی. لیکن، بو گَل اوتگن ییغینلرگه تیسکری اوشبو اولتیریشده طالبان گروهیدن هیچ بیر نماینده قتنشمه‌گن.
ییغین اوتکزیلمسدن آلدین افغانستان سیاستچیلری همده مدنی فعاللری اشتراکی یانیده پاکستان رسمیلری و طالبلر نماینده‌سی قتنه‌شیشی کوتیلردی؛ بیراق، ترقه تیلگن گزارشلرده مذکور ییغینده طالبان حرکتی نینگ هیچ بیر نماینده‌سی اشتراک قیلمه‌گن لیگی ایتیله‌دی.
پاکستانلیک خبرچی رحیم‌الله یوسفزی نینگ سلام‌وطندار ترماغیگه بیرگن صحبتیده، افغانستان‌ده برقرارلیک تامین بولیشی اسلام آباد ییغینی نینگ اصلی موضوعی ایدی دیگن. اونینگ سوزلریگه کوره، اوشبو ییغین افغانستان و پاکستان اورته‌سیده‌گی قرمه قرشیلیکلر حل بولیشی اوچون هم تاثیر سیز ایمس.
سیاسی تحلیلچی محب شریف سلام‌وطندار بیلن اوتکزگن صحبتیده، پگواش ییغینیده طالبان نماینده‌سینی اشتراک قیلمسلیگی، اولتیریشگه نسبتن طالبلر بها بیرمه گن‌لیگینی کورسته دی دیگن. او، طالبلر نظریدن پاکستان سایه‌سی آستیده بونده‌ی ییغینلرده اشتراک قیلیش بو حرکت اوچون هیچ قنده‌ی یوتوق آلیب کیلمیدی دیگن.
طالبان حرکتی اوستیگه توغریدن – توغری پاکستان نینگ تاثیر بارلیگینی تیلگه آلگن اوشبو تحلیلچی، ییغینگه طالبلر نماینده‌سی کیلمسلیگی اوچون رسمی اسلام‌آباد توسیق یره‌تگن بولیشی هم امکاندن اوزاق ایمس دیگن.
ییغین توغریسیده هنوزگچه طالبلر بیرار نرسه دیمه‌گن.
افغانستان سابق جمهور رییسی حامد کرزی، قطرده اسلامی امارت نامی آستیده طالبان نینگ سیاسی اداره‌سی آچیلیب فعالیت قیلیشیگه مخالفت کورستگندن سونگ، پگواش خلق ارا تشکیلاتی افغانستان حکومتی، سیاستچیلر و طالبلرنماینده‌سی اورتسه‌سیده بیرینچی ییغین اوتکزیلگن ایدی. کرزی اوشنده، قطر دولتی همده امریکادن اوشبو اداره ایشیگینی یاپیب فعالیتی توخته‌تیلیشنی سوره‌گن ایدی.
