بوگون (یکشنبه) تانگ وقتی بیلن قوراللی طالبلر قندوز شهری‌نینگ زاخیل منطقه‌سیده‌گی اوچینچی حوزه‌گه هجوم قیلگن. جنگریلر امنیتی کوچلر کییمیدن فایده‌لنیب پولیس نینگ پوسته‌سی‌گه کیرگن.
قرارگاه ده‌گی ملی پولیس نینگ 6 حربیسی اولدیریلگن. هجومده بیر پولیس ایسه تن جراحتی آلگن.
قوراللی طالبلر مذکور پوسته‌گه هجوم قیلگن‌ده اوییده بولگن قرارگاه نینگ قوماندانی شریف، ملی پولیس نینگ لباسینی کییب آلگن طالبلر دستلب مذکور حربیلرنی پوسته یقینی‌ده قولگه آلیب بیر اویده حبس قیلگن دیدی.
سونگ کومکی حربی صفتیده اوشبو حربی قرارگاگه باریب 2 حربینی اولدیریب تورت عسکرنی ایسه چهار دره تومنی نینگ دریا قیرغاغی‌گه آلیب باریب حیاتی‌گه نطقه قویگن جنگریلر.
اونینگ سوزلریگه کوره، جنگری طالبلر اوشبو عسکرلرنینگ بوتون حربی جهازلرینی اوزلری بیلن آلیب کیتگن. جنگریلر 6 ته کلاشنیکوف، بیرته راکت‌انداز و بیر پیکانی آلیب کیتگن.
لیکن، ولایت کینگشی نینگ اعضاسی صفی‌الله امیری‌نینگ سوزلریگه قره‌گنده، ملی پولیس نینگ حربیلریدن بیری قوراللی طالبلر بیلن تیل بیرکیتیب پهره وقتیده یولداشلرینی اولدیریب پوسته‌ده‌گی قورال اسلحه بیلن جنگریلرگه قوشیلگن.
مملکت شمال شرق پولیس قوماندانلیگی‌ده‌گی معین بیر منبع نینگ ایتیشیچه، جنگری طالبلرنینگ مذکور پوسته‌گه قیلگن هجومی عاقبتیده 7 محلی پولیس قربان بولیب و بیر پولیس ایسه تن جراحتی آلگن.
بو توغریده قندوز پولیس قوماندانی نینگ فکرینی اورگه‌نیش اوچون آلیب بارگن سعی وحرکتیمیز نتیجه آلیب کیلمه‌دی.
قوراللی طالبلر تامانی بیر اعلامیه نشر قیلیب، پوسته‌ده‌گی ملی پولیس حربیلرینی اولدیریلگن‌دن علاوه بوتون حربی جهازلرنی قولگه کیریتگن لیکلرین ادعا قیلگن.
