اوروش قربانی‌لری نینگ عایله‌لری طالبان گروهی نینگ ۴۰۰ محبوسی حکومت تامانیدن قوییب یوباریلیشی گه عکس‌العمل بیلدیریب ایتیش‌لریچه، مذکور محبوسلر قوییب یوباریلیشی قانون گه قرشی دیر. قربانی‌لرنینگ عایله‌لریگه کوره، تینچلیک مصلحتی لویه جرگه‌‌ده اولرگه فعال سهم بیریلمه‌گن.
اوروش قربانی‌لری عایله‌لریدن قطاری نینگ اورغولشیچه، حکومت اوروش قربانی‌لری نینگ غیابی گه دایمی تینچلیک‌که قول تاپه آلمه‌یدی. شونینگدیک اولر قوییب یوباریلگن محبوسلر قیته‌دن اوروش میدانی گه قیتیش‌لری توغریسده خواطرگه دیر.
اوروش قربانی‌لریدن بیری یاسر قبادیان نینگ سلام‌وطندارگه ایتیشیچه، اوروش قربانی‌لری نینگ غیابی گه بولگن تینچلیک دواملی بولمه‌یشی ممکن. اونینگ کوپه‌یتیریشیچه، حکومت طالبلرنینگ ۴۰۰ محبوسی نی قوییب یوباریشی بیلن قانون نی نقض قیلگن.
اوروش قربانی‌لریدن باشقه بیری روح‌الله رها نینگ ایتیشیچه، طالبلرنینگ ۴۰۰ محبوسی قوییب یوباریلیش خصوصیده تینچلیک مصلحتی لویه جرگه نینگ قراری، اوروش قربانی‌لریگه حرمت‌سیزلیک دیر.
افغانستان انسان حقلری و دموکراسی نهادی نینگ اجرایی مسئولی جواد زابلستانی نینگ ایتیشیچه، تینچلیک‌که ایریشیش اوچون حکومت نینگ سعی و حرکتی بیر ییرگه ییتیشمه‌یدی و بو پروسه گه اوروش قربانی‌لری کوپینچه نقش آلیش‌لری کیره‌ک.
بیراق جمهورلیک ریاستی سوزلاوچیسی نینگ اورین‌باسری درانی جاوید وزیری نینگ ایتیشیچه، طالبان محبوس‌لری نینگ قوییب یوباریلیشی اهالی نماینده‌لری نینگ مصلحتی بیلن صورت تاپگن.
افغانستان دولتی اوتگن جمعه کونی طالبان گروهی نینگ ۴۰۰ محبوسی نی قوییب یوباریش خصوصیده قرار آلیش اوچون مصلحتی لویه جرگه یولگه قویدی. مذکور جرگه اوچ کون دوام تاپدی کیم نتیجه‌ده، اشتراکچی‌لر «حق‌العبدی» جرم‌لرگه چلینگن طالبان گروهی نینگ ۴۰۰ محبوسی نی قوییب یوباریلیشی گه ایجابی آواز بیریشدی. تینچلیک مصلحتی لویه جرگه ده ۷۰۰ عیال شامل مملکت ۳۴ ولایتیدن ۳۴۰۰ کیشی شرکت قیلگن ایدی.
