د جوزجان د مردیان ولسوالۍ یو شمېر اوسېدونکي سلاموطندار ته وايي، طالبان په هغو پروژو چې دغې ولسوالۍ کې پلي کېږي، نظارت کوي او له هغو پیسې اخلي.
د دوی په وینا، طالبانو د دغې ولسوالۍ د سړک پخولو پروژې له پلي کوونکیو هم پیسې غوښتي او په همدې دلیل، د دغه سړک کارونه ولاړ دي.
د مردیان ولسوالۍ دوه اوسېدونکي عبدالجبار او اغا مراد وايي، که پیسې وانهخلي د کار اجازه نه ورکوي چې پروژه مخ ته لاړه شي. د دوی په خبره، که د دې کار مخه ونه نیول شي؛ ممکن لوی سرخوږی جوړ کړي.
د جوزجان د مردیان ولسوال تاجمحمد تقوا تاییدوي چې د طالبانو کسان د دغې ولسوالۍ له پرمختیايي پروژو، د بودیجې پر اساس ۱۰ سلنه پیسې اخلي.
د مردیان ولسوال په وینا، د طالبانو د فعالیتونو پراختیا او له پرمختیايي پروژو د پیسو اخېستل د خلکو د اندېښنې زیاتې کړېدي.
هاخوا د جوزجان امنیتي چارواکي وايي، دوی ته تر اوسه له پروژو څخه د طالبانو باج اخېستلو په اړه هېڅ ډول رسمي راپور نهدی رسېدلی؛ خو دغه ډله تل له خلکو څخه د پیسو راټولولو هڅه کوي.
په ورته وخت کې د طالبانو ویاند ذبیح الله مجاهد وايي، له پروژو څخه د دغې ډلې د کسانو له لوري د باج اخېستلو برخه کې به څېړنې وکړي.
