داعش وسله والو د جوزجان ولایت په قوش تپې ولسوالۍ کې د خوراکي توکو لېږد ۴ موټر درولي؛ هټیوال او موټر چلوونکي یې له ځانه سره وړي دي.
د قوش تپې ولسوالۍ ځايي چارواکي د دې خبر پخلی کوي او وايي، د درزاب ولسوال د داعش ډلې اړوند نفتي توکو موټر درولي وو او په غبرګون یې نن ګهیځ دې ډلې په قوش تپې کې دغه موټر او خلک له ځانه سره وړي دي.
د قوش تپې سرپرست ولسوال بای مراد سلام وطندار ته وویل، داعش ډلې د خوراکي توکو څلور موټر له ۱۵ تنو هټیوالو او موټر چلوونکو سره د دې ولسوالۍ چقمه چقر سیمې ته لېږدولي دي.
دی وايي، داعش ډلې ویلي تر هغې به نیول شوي کسان ورخوشې نه کړي ترڅو د درازب ولسوالۍ له لارې سردرې کلي ته یې د دې ډلې د نفتي توکو لېږد اجازه ورکړي نه وي.
خو د درزاب ولسوالۍ ځايي چارواکي وايي، داعش ډلې د دې ولسوالۍ د خوراکي توکو لېږد څلور موټر له چلوونکو او هټیوالو سره د نامعلوم لامل له مخې د قوش تپې چقمه چقر سیمه کې نیولي او وړي دي.
د درزاب ولسوالۍ رحمت الله حشر وايي، تراوسه د نیول شویو هټیوالو او موټرچلوونکو برخلیک معلوم نه دی.
د قوش تپې ولسوال په خبره، څه وخت مخکې د درزاب ولسوال د دې په خاطر چې د دولت وسله وال مخالفین نفتي توکو ته لاس رسی ونه لري؛ د دې ولسوالۍ له لارې یې د درزاب سردرې کلي ته د نفتي توکو په لېږد بندیز ولګولو.
