ملی خوفسیزلیک کینگش دفتری نینگ ایتیشیچه، اوتگن بیر هفته جریانیده طالبلرنینگ هجومی باعث تورلی ولایتلرده 34 تینچاهالی هلاک و شونینگدیک باشقه 62 تینچاهالی یرهلنگن.
بوگون (شنبه 6- ثور) مذکور نهاد سوزلاوچیسی جاوید فیصل خبری بیر ییغین اوتکزیب ایتیشیچه، طالبان آمریکا بیلن تینچلیک کیلیشوونامهسی نینگ امضالهگندن کیین افغانستان خوفسیزلیک کوچلری گه قرشی 2 مینگ و 804 هجوم اویوشتیرگن. اونگه کوره، مذکور هجوملرده 789 تینچاهالی هلاک و یرهلنگن.
جناب فیصل نینگ کوپهیتیریشیچه، طالبان تینچلیک کیلیشوونامهسی امضالنگندن کیین کونده امنیتی کوچلرگه قرشی 51 هجوم اویوشتیرگن کیم مذکور هجوملر نتیجهسیده، کونده کمیده 15 تینچاهالی هلاک و یرهلنگن.
تینچلیک کیلیشوونامهسی اوتگن ییل 10- حوت ده طالبان و آمریکا آرهسیده امضالندی.
ملی خوفسیزلیک کینگش سوزلاوچیسی نینگ ایتیشیچه، شونینگدیک طالبان بو پیتده 2 مینگ و 737 قربانی بیرگن و یالغیز اوتگن بیر هفتهده، 93 طالب هلاک و باشقه 210 طالب یرهلنگن.
طالبان گروهی حاضرگچه بو توغریده فکر بیلدیرمهگن.
شوندهی بیر حالده، اوتگن کون ناتو بیر اعلامیه ترقهتیب، افغانستان ده بیر تینچلیک کیلیشووی ایجاد ایتیلیشی اوستیگه اورغولب و برچه تامانلردن زوروانلیک نی کمهیتیریش توغریسیده بیرگن وعدهلرینی عمل گه آشیریشلرینی سورهدی.
عین حالده آمریکا مدافعه وزیری مارک اسپر نینگ ایتیشیچه، آمریکا و اونینگ ناتو تشکیلاتیدهگی بیرلشیکلری، طالبلردن افغانستانلیکلرارا سوزلشوولر باشلهنیشی گه زمینه یرهتیلیشی اوچون زوروانلیک میزانی نینگ کمهیتیریشی نی سورهشگن.
اونینگ کوپهیتیریشیچه، برچه تامانلر حاضرگی فرصتدن فایدهلنیب و دواملی بیر تینچلیک تأمین ایتیلیشی اوچون سعی و حرکت قیلیشلری کیرهک.
شو توغریده:
