قطرده طالبان گروهی سیاسی دفتری سوزلاوچیسی سهیل شاهین نینگ سلام‌وطندارگه ایتیشیچه، آمریکا و طالبان نماینده‌لری آره‌سیده 8- دور تینچلیک سوزلشوولریده دییرلی کیلیشمه‌لر قولگه کیلگن.
جناب شاهین نینگ کوپه‌یتیریشیچه، گرچند افغانستان تینچلیک لایحه‌سی بوییچه آمریکانینگ خاص نماینده‌سی زلمی خلیلزاد، هند کیتگن، بیراق آمریکا و طالبان هیأتی آره‌سیده تینچلیک سوزلشوولری دوام ایتماقده و تیزلیک‌که تینچلیک کیلیشوونامه‌سی امضاءلنیشی ممکن.
اونگه کوره، تینچلیک کیلیشوونامه‌سی قطار قوشنی مملکت‌لرنینگ نماینده‌لری، بیرلشگن ملت‌لر تشکیلاتی، روسیه و چین نماینده‌لری حضوریده امضاءلنه‌دی.
سیاسی ایش بیلرمانلردن بیرقطاری، افغانستان قضیه‌لریده روسیه و چین مملکت‌لرینی دخیل دیب بیله‌دیلر.
سیاسی ایش بیلرمان و بیلیم یورت استادی شهباز حکمت نینگ ایتیشیچه، تینچلیک کیلیشوونامه‌سی عمل‌گه آشیریلیشی‌ده مذکور مملکت‌لرنینگ حضوری و رولی تأثیرچن دیر.
سیاسی ایش بیلرمانلردن باشقه بیری یونس فکورنینگ ایتیشیچه، سونگی پیت‌لر چین و روسیه طالباندن سیاسی و اقتصادی حمایت قیله‌دیلر و چین اویغورلری و روسیه چچین‌لری طالبان نینگ یانیده اوروشه‌دی و شونینگدیک، آمریکا، چین دن طالبان اولرگه قرشی تهدید بولمه‌سی توغریسیده ضمانت طلب قیله‌دی.
افغانستان تینچلیک لایحه‌سی بوییچه آمریکانینگ خاص نماینده‌سی زلمی خلیلزاد، اوتگن کون کیچ قورون افغانستان تینچلیک جریانی خصوصیده، دنیا فکر بیرلیگی‌نی تأمین‌لش اوچون هند کیتگن.
جناب خلیلزاد، ینگی توییتیده طالبان گروهی بیلن اوتکزیله‌دیگن جاری تینچلیک سوزلشوولریدن خرسندلیک بیلدیریب و ایتیشیچه، اولر کیلیشوونامه‌نی امضاءلش گه یقین‌لشگن.
شونینگدیک، خبری بیر ییغینده ناتو باش کاتبی ینس استولتنبرگ نینگ ایتیشیچه، افغانستان تینچلیگی اوچون حقیقی فرصت یره‌تیلگن و اولر باشقه هر زماندن کوره تینچلیک کیلیشووی گه یقین بولگن‌لر.
