قطرده طالبان سیاسی دفتری سوزلاوچیسی نینگ ایتیشیچه، افغانستاندن تشقی کوچلرنینگ چیقیشی خصوصیده کیلیشگونگهقدر، مذکور گروه و آمریکا آرهسیدهگی تینچلیک کیلیشوونامهسی نهایی بولمهیدی.
تینچلیک کیلیشوونامهسی امضاءلنگنیدن سونگ، افغانستاندن تشقی کوچلرنینگ چیقیشی، تینچلیک جریانی نی قیینچیلیککه دوچ قیلگن مسئله دیر.
طالبان گروهی تامانیدن تینچلیک کیلیشوونامهسیگه قول قوییش شرطلریدن بیری، افغانستاندن تشقی کوچلر چیقیشی دیر، بیراق آمریکاییلیکلرنینگ اورغولشیچه، تینچلیک کیلیشوونامهسی نهایی بولگنده هم افغانستان خوفسیزلیک کوچلریدن اولرنینگ حمایتی دوام ایتهدی.
قطرده طالبان سیاسی دفتری سوزلاوچیسی سهیل شاهین نینگ ایتیشیچه، افغانستاندن تشقی کوچلرنینگ چیقیشی تینچلیک کیلیشوونامهسی امضاءلنیشی توغریسیده اساسی شرط دیر و افغانستاندن بو کوچلرنینگ چیقیشی نهایی بولگونگهقدر، تینچلیک کیلیشوونامهسی امضاءلنمهیدی.
جناب شاهین گه کوره، اولر تینچلیک سوزلشوولرینی 9- دوری ده تینچلیک کیلیشوونامهسینی سونگی مسئلهسی توغریسیده آمریکاییلیکلر بیلن صحبت قیلیب و بو کیلیشوونامهنی نهایی قیلیش اوچون سعی و حرکت قیلهدیلر.
بیراق، افغانستان تینچلیک لایحهسی بوییچه آمریکا تشقی ایشلر وزیرلیگینی خاص نمایندهسی زلمی خلیلزادنینگ ایتیشیچه، آمریکاییلیکلر طالبان بیلن کیلیشگنده هم، افغان خوفسیزلیک کوچلریدن حمایت قیلهدی.
عین حالده، طالبان گروهی نینگ سابق اعضالریدن بیری سیداکبر آغانینگ ایتیشیچه، طالبان گروهی افغانستاندن تشقی کوچلر چیقیشی توغریسیده بولگن ایستکلریگه جدی دیر و تینچلیک کیلیشوونامهسی امضاءلنگنیدن سونگ، افغانستانلیکلر ارا سوزلشوولر، طالبان و افغانستان حکومتی آرهسیده بولگن قیینچیلیکنی حل قیلیب و حکومت بیلن طالبان آرهسیده آتیشمهلر دوام ایتیشی خصوصیده آمریکا و دنیا جماعهچیلیگی نینگ خواطرلرینی رفع قیلیشی ممکن.
بیراق، سیاسی ایش بیلرمان بسمالله رنجبرنینگ ایتیشیچه، افغانستان دولتی، آمریکا و طالبان نینگ ارزشلری بیر-بیراوی گه ضد دیر و شو یوزهدن افغانستاندن تشقی کوچلرنینگ چیقیشی و چیقمهسی سوزلشوو تامانلری آرهسیده ضدیت گه سبب بولگن.
عین حالده، اوتگن کون 7- گروه باشلیغلری نینگ ییغینی چیکَّهسیده آمریکا جمهور رئیسی دونالد ترامپ، آمریکا و طالبان آرهسیده تینچلیک سوزلشوولریگه اشاره قیلیب ایتیشیچه، افغانستاندن آمریکا کوچلری چیقیشی توغریسیده زمانی بیر جدول یوق دیر.
آمریکا و طالبان آرهسیدهگی 9- دور تینچلیک سوزلشوولری، اوتگن هفته (پنجشنبه) کون قطرنینگ دوحه شهریده باشلندی و حاضرهم دوام ایتماقده.
شو توغریده…
طالبان: تینچلیک کیلیشوونامهسی نهایی بولیشی توغریسیده سعی و حرکت قیلهمیز
