د فاریاب والي نقیب الله فایق وايي، طالب وسلهوالو هېواد نه بهر د خپلو مشرانو په امر دغه ولایت کې د دهندره د اوبو بند پروژې چارې درولي دي.
د نوموړي په وينا، طالبانو تر دې وړاندې المار ولسوالۍ کې د اوبو بند چارو پر وړاندې خنډ جوړ کړی و چې پای کې يې هغه پروژه هم ترسره نه شوه.
په ورته وخت کې د فاریاب د ولایتي شورا غړی فضلالحق محمدي وايي، ولایتي شورا هڅه کوي چې د سیمې د اوسېدونکيو په منځګړیتوب دغه موضوع حل کړي؛ خو پروژه د طالبانو تر کنټرول لاندې سیمه کې ده، نو له دې کبله هغوی په ټول توان سره هڅه کوي چې مخه یې ونیسي.
د فاریاب د حج او اوقافو رییس ګل احمد لطفي هم وايي، طالبانو تل بېلا بېلو برخو کې د پرمختیايي پروژو عملي کېدو پر وړاندې خنډونه جوړ کړي دي.
د فاریاب مرکز د میمنې ښاروال جاوېد کیوان وايي، د دهندره د اوبو بند پروژه خلکو پورې اړوند ده او طالبان په دې کار سره د خلکو د ګټې مخه نیسي.
د فاریاب پښتونکوټ ولسوالۍ کې د دهندره د اوبو بند جوړولو چارې د ۱۳۹۶ کال عقرب میاشت کې پیل شوې چې تر نن پورې نه دي بشپړې شوي.
