په بغلان کې محلي او امنیتي سرچینې وايي چې طالبانو د دغه ولایت د مرکز پلخمري ښار پر حومه سیمې د ډېرو بریدونو ترڅنګ، له امنیتي ځواکونو سره نښتي دي.
د سرچینې په وینا، طالبانو د شمالباغ او چشمهشیر سیمه کې د بغلانـسمنګان لویه لار هم تړلې ده. د دغو نښتو او د لارې تړلو له کبله دواړو لوریو ته شاوخوا سل مسافروړونکي او باروړونکي موټر بند پاتې دي.
یادو سرچینو سلاموطندار ته ویلي چې تر اوسه د امنیتي ځواکونو او طالبانو ترمنځ په نښتو کې د ملي اردو ۴ سرتېري وژل شوي او ۱۰ نور ټپیان دي. د دوی په وینا، د امنیتي ځواکونو ۴ هاموې ټانګونه هم له منځه وړل شوي دي.
دغه راز د بېګاه شپې په نښتو کې د بغلان ولایت د ملي اردو د پنځم کنډک د ارکان رییس محمدظاهر سرجنګ هم وژل شوي او یوشمېر نور سرتېري ټپیان شوي دي.
د بغلان د روغتیا رییس محبالله حبیب وايي، تر اوسه د امنیتي ځواکونو ۵ سرتېري د دغه ولایت روغتون ته ور وړل شوي چې د دوو هغو روغتیايي وضعیت د اندېښنې وړ دی.
بلهخوا یوشمېر سرتېري چې د جګړې په لومړۍ کرښه کې دي وايي، اوس د دوی او طالبانو ترمنځ سخته جګړه روانه ده. دوی په بغلان کې د لازمې همغږۍ نه موجودیت او د مرستندویه ځواکونو کموالی د طالبانو د بریدونو ستر لاملونه بولي.
د یادونې ده چې طالبانو له یوې اوونۍ راهیسې د پلخمري ښار په شاوخوا سیمو کې خپل بریدونه پیل کړي او له امنیتي ځواکونو سره جګړه کوي.
په بغلان کې د پوځ د درېیمې لوا قوماندان نبيالله نبيزاده د دغه خبر د تایید ترڅنګ وايي، امنیتي ځواکونه هڅه کوي چې د بغلانـسمنګان لویه لاره بېرته خلاصه کړي.
د یادې لوا قوماندان د امنیتي ځواکونو د مرګژوبلې په اړه جزیات نه ورکوي، خو په دغه ولایت کې د طالبانو د ځپلو لپاره د هوايي عملیاتو خبر ورکوي.
