جمهورلیک ریاستی بیرینچی اورین باسری امرالله صالح گه قرشی اویوشتیریلگن هجوم ایچکی و چیت‌ایللیک واکنش‌لر بیلن روپه‌ره بولگن. مذکور هجوم دن سونگ، ملی مصالحه کینگشی باشلیغی عبدالله عبدالله، جمهورلیک ریاستی ایکینچی اورین باسری سرور دانش و ملی خوفسیزلیک کینگشی مصلحتچی‌سی حمدالله محب شامل حکومت بیرقطار یوقاری لوازملی رسمی‌لری جناب صالح نینگ ایش دفتری‌گه باریب او بیلن اوچره‌شگن.
جمهورلیک ریاستی، بیر خبرنامه آرقه‌لی جناب صالح گه قرشی اویوشتیریلگن هجوم‌نی قاره‌لگن. مذکور خبرنامه‌ده مملکت جمهور رئیسی محمداشرف غنی دن نقل قیلینیب ایتیلیشیچه: «تروریست‌لر و چیت‌ایللیک حمایتچی‌لری بونده‌ی جنایت انجام بیریش بیلن تینچلیک، جمهوریت و مملکت کیله‌جگی‌نی کوچ‌سیز قیله آلمه‌یدی.» خبرنامه‌گه کوره، تروریست‌لرگه قرشی امنیتی کوچلرنینگ کوره‌شیش‌لری دوام قیلماقده.
شونینگدیک، ملی مصالحه کینگشی باشلیغی عبدالله عبدالله نینگ اوشبو هجوم قاره‌لب ایتیشیچه، شونده‌ی بیر شرایط جمهورلیک ریاستی بیرینچی اورین باسری‌گه قرشی اویوشتیریلگن هجوم، تینچلیک دشمن‌لری نینگ افغانستانده تینچلیک و ثبات تامین‌لنیشینی ایستمه‌یشلرینی کورسته‌دی.
ملی مصالحه کینگشی باشلیغی، مربوط بولگن نهادلردن اوشبو هجوم‌نی جدی شکلده تیکشیریش‌لرینی سوره‌گن.
جمهورلیک ریاستی ایکینچی اورین باسری محمدسرور دانش نینگ بیر اعلامیه نشر قیلیب ایتیشیچه، بوتون اهالی طالبان و افغانستان حکومتی آره‌سیده سوزلشوولر باشله‌نیشی‌نی کوتیب تورگن بیرحالده، جمهورلیک ریاستی نینگ بیرینچی اورین باسری‌گه قرشی هجوم تینچلیک شرطنامه‌سینی نقض قیله‌دی.
عین‌حالده، جمهورلیک ریاستی سوزلاوچی صدیق صدیقی نینگ جناب صالح گه قرشی اویوشتیریلگن هجوم‌نی قاره‌لب ایتیشیچه: «اوشبو هجوم و سونگی باشقه هجوم‌لر تینچلیک دشمن‌لری نینگ ایش‌لری دیر و اولر دولت و اهالی گه قرشی زوروانلیک‌که دوام بیره‌دی.»
شونینگدیک، ملی خوفسیزلیک کینگشی مصلحتچی‌سی حمدالله محب نینگ توییتر صحیفه‌سیده یازیشیچه: «تروریست‌لر نفرت ایجاد قیلیش بیلن شوم مقصدلریگه ییتیشه آلمه‌یدی.»
مملکت تشقی ایشلر وزیرلیگی سرپرستی محمدحنیف اتمر نینگ اوشبو واقعه‌نی قاره‌لب ایتیشیچه: «مملکت دشمن‌لری بونده‌ی هجوم‌لر بیلن تینچلیک جریانی‌گه توسیق بوله آلمه‌یدی. تینچلیک‌که قول تاپیش اوچون بیزیم اراده‌میز کوچلی دیر.»
بوگون "چهارشنبه" نماینده‌لر کینگشی باشلیغی میررحمان رحمانی نینگ مذکور هجوم‌نی قاره‌لب ایتیشیچه، افغانستان دشمن‌لری تروریستی شبکه‌لر حمایتی آرقه‌لی افغانستان‌لیکلر ارا سوزلشوولرنی تخریب قیلیش اوچون سعی و حرکت قیله‌دی.
شونینگدیک، ناتو تشکیلاتی نینگ جمهورلیک ریاستی بیرینچی اورین باسری‌گه قرشی اویوشتیریلگن هجوم‌نی قاره‌لب ایتیشیچه، تینچلیک دشمن‌لری زوروانلیک‌که توسیق بولیش و افغانستان‌لیکلر ارا سوزلشوولر باشله‌نیشی خصوصیده اهالی ایسته‌گی گه دقت قیلمه‌گنلر.
پاکستان تشقی ایشلر وزیرلیگی هم اوشبو هجوم‌نی قاره‌لب و بو واقعه‌گه قربان بولگنلرنینگ عایله اعضالری بیلن قیغوداشلیک بیلدیرگن.
