پاره بیشریگه عیب‌لنگن شهر قوریش وزیرلیگی‌نینگ اوچ رسمی‌سی جواب بیریش اوچون باش قاره‌لاوچیلیک‌که حاضر بولدی.
جمهور رییس‌غنی اوتکن هفته پنج‌شنبه کونی باش قاره‌لاوچیلیک‌دن، شهرقوریش وزیرلیگی‌نینگ پاره بیریش‌گه عیب‌لنگن آلتی بلند مرتبه‌لی رسمی‌سی مملکت‌دن چیقیشی‌نی توسیش‌نی سوره‌گن ایدی. عینحالده، غنی اولرنینگ وظیفه‌لری توخته‌تیلیشی‌نی سوره‌گن ایدی.
اوی قوریش تصدی باشلیغی احمدنواز بختیار، آپارتمان قوریش ایشلری بوییچه انسجام اداره مسؤولی محمدامین قانع، مرکزی شهرقوریش اداره‌سی باشلیغی احمدشاه همت، املاک و اسکان اداره‌سی باشلیغی محمدامین امین، پلان و پالیسی اداره باشلیغی انجنیر گل‌رحیم زیارمل و شهرقوریش ایشلری بوییچه انسجام دفتری مسؤولی محمدامان سادات فسادگه عیب‌لنگن‌لر.
مذکور کیشی‌لرنینگ دوسیه‌سی جمعه کونی باش قاروچیلیگی‌گه یوباریلگن.
قانون گه کوره، باش قارهلاوچیلیک عالی کینگشی اوشبو دوسیه‌لر اوستیگه تیکشیرولرینی عملگه آشیره‌دی.
نامی فاش ایتیلیشی‌نی ایستمه‌گن بیر منبع‌نی سلام وطندارگه ایتیشیچه، شنبه کونی باش قارهلاوچیلیک عالی کینگشی شهر قوریش وزیرلیگی رسمی‌لری نینگ دوسیه‌سی اوستیگه بحث اوتکزیش‌نی باشله‌گن.
بیراق باش قارهلاوچیلیک سرپرستی نورحبیب جلال نینگ سلام وطندارگه ایتیشیچه، تیکشیروو نتیجه گه ییتیشمه گونچه فاش ایتیلمه‌یدی.
جناب جلال‌گه کوره، مذکور وزیرلیک‌نی اوچ رسمی‌سی شنبه کونی جواب بیریش اوچون باش قاره‌لاوچیلیک‌که حاضر بولگن و باشقه 3 ته‌سی هم ایرته‌گچه حاضر بولیشی کوتیله‌دی.
عین حالده، بعضی بیر گزارش‌لرگه کوره، مذکور کیشی‌لردن بیرقطاری مملکت‌دن قاچیب کیتکن.
باش قارهلاوچیلیک سرپرستی نینگ ایتیشیچه، جرم گه عیب‌لنگن کیشی قانون‌دن قاچه آلمه‌یدی.
جناب جلال‌گه کوره، مملکت‌دن تشقری قاچگن مجرم‌لر انتر پول پولیسی آرقه‌لی قول‌گه آلینیب، ممکت‌گه قیتیریلیشی ممکن.
عین حالده، پارلمان نماینده‌لریدن بیرقطاری، شهرقوریش وزیرلیگی‌نینگ فسادگه عیب‌لنگن آلتی بلندمرتبه‌لی رسمی‌سی دوسیه‌لری جدی صورتده تیکشیریلیشی‌نی سوره‌گن‌لر.
نماینده‌لر کینگشی اعضاسی غلام فاروق مجروح، حکومت‌دن مذکور کیشی‌لرنینگ دوسیه‌لری تیکشیریلیشی و کابل‌بانک قضیه‌سی تکرار بولمس‌لیگی‌نی طلب قیلگن.
کابل بانک قضیه‌سینی تیکشیریش، مس عینک شرط نامه‌سینی بیکار ایتیش، مدافعه وزیرلیگینی یاقیلغی ماده‌لر بیلن تامین لاووچی کیلیشوو بیکار قیلینیشی و آیسا اداره‌سی نینگ اورین باسری و سرپرستی ایشی توخته‌تیلیشی ملی بیرلیک حکومتی نینگ اداری فسادگه قرشی کوره‌شیش آلیب بارگن حرکت‌لریدن سنله‌دی.
